Naǵyz polısıa mamandary qala turǵyndaryn saq bolýǵa shaqyrdy.
Almaty qalalyq polısıa departamenti bastyǵynyń orynbasary Rýstam Ábdirahmanov turǵyndardy ınternet-alaıaqtardan saq bolýǵa shaqyrdy, dep habarlaıdy Almaty-akshamy.kz QazAqparatqa silteme jasap.
«Qylmyskerler mynandaı sqemamen áreket etedi: olar uıaly telefonǵa qońyraý shalyp, ózin polısıa qyzmetkerimin dep tanystyrady. Sonyń ishinde meniń de atymdy ataýy múmkin. Sodan keıin sizdiń atyńyzǵa nesıe almaq bolǵan alaıaqtardy ustaý úshin qazir arnaıy operasıa júrgizilip jatqanyn eskertedi»,- dep jazdy Rýstam Ábdirahmanov óziniń telegram-kanalynda.
Rýstam Ábdirahmanovtyń aıtýynsha, «jalǵan polısıa qyzmetkerleri» qazir QR Ulttyq bankimen birlesip jumys isteıtinin habarlap, dál sol kezde olarmen baılanysatynyn aıtyp, jelide qalýdy suraıdy. Bul – alaıaqtardyń taǵy bir áreketi.
«Odan keıin telefonnyń arǵy jaǵyndaǵy adam sizdiń kartańyzǵa ruqsatsyz aqsha aýdarý áreketteri júrip jatqanyn jáne aqshańyzdy saqtaý úshin bank shotyna nemese úshinshi tulǵalardyń shotyna belgili bir somany salý kerek ekenin aıtyp, úgitteıdi»,- dep atap ótti polısıa ókili.
Almaty qalalyq polısıa departamenti bastyǵynyń orynbasary polısıa qyzmetkerleri eshqashan telefon arqyly arnaıy operasıalar men tergeý áreketterin júrgizbeıtinin eskertti.
«Mundaı jaǵdaılarda telefonmen sóılesýdi toqtatyp, bank kartasynda nemese bank saıtynda kórsetilgen senimdi nómirge qaıta qońyraý shalý kerek. Qandaı jaǵdaı bolmasyn bank kartańyzdyń derekterin, sonymen qatar jeke basyńyzǵa qatysty málimetterińizdi eshkimge aıtpańyz, jibermeńiz», – dedi Rýstam Ábdirahmanov.