Memlekettik aktıvterdi qaıtarý boıynsha jumystar júrgizildi.
Sonyń aıasynda jalǵan kásipkerlerdiń 1 mlrd teńgeden asa kólemdegi múlikteri qaıtarylady, dep habarlaıdy Almaty-akshamy.kz.
Almaty qalasynyń prokýratýrasy shyǵarylǵan memlekettik aktıvterdiń zańdylyǵyn tekserip jatyr. 2017 jyly sottyń úkimimen jalǵan kásipkerlik pen aqshalaı qarjyny qolma-qol aınaldyrǵany úshin uıymdasqan qylmystyq top sottaldy.
Atap aıtqanda, 86 jalǵan kásipkerlik ashyp, 87 mlrd teńgeden asa qarajatty qolma-qol aınaldyryp, 27,7 mlrd teńgege salyq tóleýden jaltarǵan. Olar qylmystyq jolmen alynǵan qarajattaryn múlikterdi satyp alý arqyly zańdastyrǵan. Sottyń úkimimen qaladaǵy bedeldi aýdanda ornalasqan 1,3 myń sh/m jýyq kólemde turǵyn úı qurylysy bar jalpy kólemi 1,4 ga bolatyn eki jer telimderi qaıtaryldy. Jerlerdiń bireýinde tikushaq qonatyn alań ornalasqan. Ol obektiniń shamamen naryqtyq quny 1 mlrd teńgeni quraǵan.
Sonymen qatar prokýrorlar anyqtaǵandaı, qylmyskerler múlikterin tárkileýden jaltartý úshin jer telimderin sottalǵandardyń bireýiniń ákesiniń atyna jazǵan. Keıin sot úkimin oryndaýdan jaltarý úshin jyljymaıtyn múlik tórt márte úlestes tulǵalardyń arasynda jer teliminiń konfıgýrasıasyn ózgertý arqyly júzege asyrylǵan. Jalǵan mámilelerdi jasaý nátıjesinde múlik qaǵaz júzinde sottalǵandardyń bireýiniń qyzyna qaıtarylǵan. Budan bólek, osyndaı júıemen múlikti saqtap qalý úshin jer telimderiniń ıeleriniń biri jalǵan nekege otyrǵan.
Almaty qalasy Bostandyq aýdanynyń prokýratýrasy atalǵan mámilelerdi, jalǵan neke týraly mámileni zańsyz dep taný týraly sotqa júgindi.
«Júrgizilgen aýqymdy sot prosesteri, sondaı-aq azamattyq istiń apelásıalyq satyda qaralý nátıjesi negizinde, qadaǵalaý organynyń talap aryzy tolyǵymen qanaǵattandyryldy. Joǵaryda qabyldanǵan sharalar memleket paıdasyna baǵaly múlikterdiń qaıtarylýyna negiz bolady», - delingen habarlamada.