Almatyda “Kıberpol” qyzmetkerleri qalalyq prokýratýranyń úılestirýimen arnaıy operasıa júrgizdi.
Operasıa barysynda turǵyn úı keshenderiniń birindegi jaldamaly páterde uıymdastyrylǵan shaǵyn avtomatty telefon stansıasy anyqtaldy. 26 jastaǵy azamat ustaldy, dep habarlaıdy aqshamnews.kz Polisia.kz-ke silteme jasap.
– Úıdi tintý kezinde 32 SIM-karta sloty bar SIM-qorap jabdyǵy, sondaı-aq uıaly baılanys kompanıalarynyń birine tıesili 285 SIM kartasy tabyldy. Bul jabdyqty ınternet-alaıaqtar anonımdi bolyp qala otyryp, ártúrli ınternet-qyzmetterdi jáne messendjerlerdi belsendirý, akkaýnttardy tirkeý úshin paıdalanady, olardyń kómegimen alaıaqtar basqa elde bola tura qazaqstandyqtarǵa telefon soǵady. Kúdikti osy jabdyqty ornatý, qosý jáne slottardaǵy SIM-kartalardy aýystyrýdan turatyn “jumysty” ınternetten tapqanyn aıtty. Qazirgi ýaqytta qylmystyq is aıasynda jedel sharalar júrgizilip jatyr. Ustalǵan azamat qamaýǵa alyndy, – dedi Almaty qalalyq polısıa departamenti bastyǵynyń birinshi orynbasary Qýatbek Naýatov.