Jyl basynan beri megapolıste 1560 ınternet-alaıaqtyq faktisi tirkeldi. Óńirlik komýnıkasıalar qyzmetinde ótken brıfıńte Almaty qalalyq polısıa departamenti krımınaldyq polısıa basqarmasynyń bastyǵy Qýatbek Naýatov osyndaı statısıkalyq málimetterdi keltirdi, dep habarlaıdy Almaty-akshamy.kz.
Polısıa vedomstvosynda 5 jyl ishinde mundaı qylmystardy saralap, 2017 jyly qalada 90 ınternet-alaıaqtyq tirkelse, 2018 jyly – 142, 2019 jyly – 666, 2020 jyly – 1677, 2021 jyly olardyń sany 3398-ge artyp, mundaı qylmys túrleriniń ashylýy 4,3 ese ósti.
«Jyl basynan beri Almaty aýmaǵynda 1560 ınternet-alaıaqtyq tirkelgen. Eger ótken jyldyń sáıkes kezeńimen salystyratyn bolsaq, qylmys sany 34,6%-ǵa tómendedi. 2022 jyldyń 7 aıynda qylmystardy ashý paıyzy 30%-dan asty», - dedi Qýatbek Naýatov.
Internet salasyndaǵy qylmystar sanynyń azaıýyna tártip saqshylary júrgizetin profılaktıkalyq jumys áser etti. Vedomstvonyń jedel qyzmetkerleri men baspasóz qyzmeti habarlamalardy taratady, alaıaqtardyń qylmystyq syzbalary týraly baıandaıtyn beınerolıkter daıyndaıdy. Sonymen qatar, aqparat ortalyq kósheler men kınoteatrlardyń elektrondy bılbordtarynda ornalastyrylǵan.
Almaty qalasy polısıa departamenti krımınaldyq polısıa basqarmasynyń bastyǵy Qýatbek Naýatov azamattardy qyraǵy bolýǵa jáne negizgi saqtyq sharalaryn ustanýǵa shaqyrdy. Mysaly, beıtanys adamdardyń ótinishi boıynsha Anydesk jáne Teamviewer syndy qashyqtan kirý baǵdarlamalaryn ornatpaý. Bul baǵdarlamalar alaıaqtarǵa telefon kitapshasyna, mobıldi bankterge jáne gadjettiń jadynda saqtalǵan basqa jeke málimetterge tolyq qol jetkizýge múmkindik beredi.
«Aldaýdyń tanymal tásilderiniń biri – ózderin banktiń qaýipsizdik qyzmetkeri retinde tanystyratyn qaskúnemderdiń qońyraýlary. Jábirlenýshilermen áńgime barysynda olar ózderiniń shottarynan kúdikti tranzaksıalar jasalyp, jańylystyrylǵanyn aıtady. Jábirlenýshilerden aqsha qarajatyn únemdeý maqsatynda uıaly telefonyna Anydesk nemese Teamviewer qosymshalaryn júkteýdi suraıdy. Alaıda, keıinnen bul baǵdarlamalar olardyń ıeleriniń smartfonyna jáne sáıkesinshe mobıldi bankıng qosymshasyna tolyq qol jetkizýge múmkindik beredi. Qol jetkizgennen keıin alaıaqtar jalǵan shottarǵa zańsyz tranzaksıalar júrgizedi», - dep jedel qyzmetker alaıaqtardyń jıi áreket etetin sqemasyn sıpattady.
Osy sqema boıynsha sottarǵa 461 qylmystyq is jiberildi.
Qýatbek Naýatov dereý polısıaǵa habarlasýdy, sonymen birge barlyq hat-habarlardy saqtaýdy, ekrannyń skrınshotyn túsirýdi (keıbir messendjerlerde qylmyskerler barlyq dıalogty ózderi joıa alady), eger siz bankomatty nemese aqsha salý termınalyn qoldansańyz, chekterdi saqtaýdy usynady.
Basqarma bastyǵynyń aıtýynsha, ınternettegi alaıaqtyqty ashý jáne tergeý belgili bir qıyndyq týdyrady, óıtkeni ol transshekaralyq sıpatqa ıe, jábirlenýshi bir aımaqta, al qylmysker basqa aımaqta.
«Ár túrli banktik shottar, plasıkalyq kartalar, úshinshi tulǵalarǵa resimdelgen abonenttik nómirler paıdalanylady, qolma-qol aqshany qolma-qol aqshaǵa aınaldyrý jalǵan tulǵalar arqyly júrgiziledi. Olx.kz, Kolesa.kz, Krisha.kz, Market.kz, Instagram.com jáne Vkontakte.com áleýmettik jelileri - qaladaǵy ınternet-alaıaqtyq eń zaqymdalǵan platformalary», - dep aıtty ÓKQ spıkeri.