Qalamyzda jyl basynan ınternet-alaıaqtyqtyń 207 faktisi tirkelgen.
Ótken jyldyń osy kezeńimen salystyrǵanda, bul kórsetkish 3,3 esege az, dep habarlaıdy Almaty-akshamy.kz
«Ótken jyly áleýmettik jeliler men tanymal saýda alańdary arqyly azamattardy aldaǵan 97 ınternet alaıaǵy ustaldy. Alaıaqtyqtyń aldyn alý máselesinde adamdardyń aqparattyq saýattylyǵy men qyraǵylyǵy mańyzdy. Sebebi jeke múliktiń qorǵalýyna, eń aldymen, olar ózderi kepil bola alady. İs júzinde, ókinishke oraı, biz ınternette saýda jasaý mádenıetiniń múldem joqtyǵyn kóremiz. Pandemıanyń bastalýymen kóptegen turǵyn úı jáne turmystyq máselelerdi sheshý onlaın deńgeıge kóshti. Bul faktor, jeńil aqshaǵa áýesterge «paıdasyn» tıgizdi», - dedi Almaty qalalyq polısıa departamenti krımınaldyq polısıa basqarmasynyń bastyǵy Qýatbek Naýatov.
Basqarma bastyǵynyń aıtýynsha, ınternet-alaıaqtyqtyń negizgi túrleri kórsetilip, azamattarǵa ózderin qorǵaý joldary usynylǵan áleýmettik rolıkter birer aı buryn ázirlenip, keńinen taratylǵan.
«Sonymen qatar, jelilerge monıtorıń júrgizilýde. Anyqtalǵan alaıaqtyq saıttar men siltemelerdiń tizimderi apta saıyn buǵattaý úshin ári qaraı jiberiledi. 2021 jyly bizdiń bastamamyz boıynsha áleýmettik jeliler men alańdardaǵy 477 saıt pen alaıaqtyq paraqshalar buǵattaldy», - dedi podpolkovnık Qýatbek Naýatov.