Vaksınoprofılaktıka – medısınanyń eń úlken jetistigi
23-29 sáýir aralyǵynda megapolıste ımmýndaý aptalyǵy ótedi. Bul týraly Almaty qalasynyń sanıtarlyq-epıdemıologıalyq baqylaý departamenti málim etti, dep habarlaıdy Almaty-akshamy.kz.
Immýndaý aptalyǵynyń maqsaty – turǵyndardy vaksınasıamen qamtý deńgeıin arttyrý, halyqqa árbir balanyń ekpemen aldyn alatyn aýrýlardan qorǵalýy qajet ekenin túsindirý.
«Vaksınoprofılaktıka – medısınanyń eń úlken jetistigi jáne Qazaqstanda ǵana emes, búkil álemde qoǵamdyq densaýlyq saqtaýdyń ekonomıkalyq tıimdi sharasy. Vaksınasıa – halyqty juqpaly aýrýlardyń paıda bolýy men taralýynan qorǵaýdyń eń tıimdi quraldarynyń, sonymen qatar eń qaýipsiz medısınalyq aralasýlardyń biri. Ulttyq egý kúntizbesine sáıkes, josparly túrde týberkýlezge, V vırýstyq gepatıtine, polıomıelıtke, kókjótelge, sirespe dıfterıasyna, qyzylshaǵa, qyzamyqqa, epıdemıalyq parotıtke, gemofıldi jáne pnevmokokty ınfeksıaǵa qarsy vaksınasıa júrgiziledi», - dedi Almaty qalalyq sanıtarlyq-epıdemıologıalyq baqylaý departamentiniń basshysy Qasymhan Alpysbaıuly.
Onyń aıtýynsha, búginde vaksınalardyń ekiden altyǵa deıingi komponentterin bir dozada biriktirýge múmkindik beretin, ıneksıalardyń sanyn azaıtatyn vaksınalar bar. Bizdiń elde qoldanylatyn barlyq vaksınalardy DDU paıdalanýǵa usynǵan jáne Qazaqstanda tirkelgen.
«Respýblıka aýmaǵynda qoldanylatyn vaksınalar qaýipsiz jáne tıimdiligi joǵary», - dedi ol.
Sonymen qatar, ol kóptegen ata-ana profılaktıkalyq vaksınany balalaryna egýden bas tartatynyn tilge tıek etti.
«Bul rette ártúrli áleýmettik jelide taralatyn burmalanǵan, durys emes aqparat keri áser etedi. Balasyna vaksına salǵyzýdan bas tartqan ata-analar tek ózderine ǵana emes, basqa balalarǵa da juqtyrý qaýpin týdyrady», - dedi ol.
Almaty qalasynda Eýropalyq ımmýndaý aptalyǵyn ótkizý kezeńinde vaksınasıa turǵylyqty jeri boıynsha emhanalarda tegin júrgiziledi. Qala emhanalary vaksınasıa máseleleri boıynsha halyqqa konsýltasıalyq kómek kórsetýge, vaksınasıa týraly derektersiz basqa óńirlerden kelgen nemese ekpe almaǵan balalardy egýge daıyn.