Almatyda Bıbigúl Tólegenovanyń HII Halyqaralyq vokalıster konkýrsy bastaldy.
Arý Almatyda aldaǵy qala kúni men Abaı atyndaǵy Ulttyq akademıalyq opera jáne balet teatrynyń 95-maýsymynyń ashylýyna oraı Bıbigúl Tólegenova atyndaǵy HII Halyqaralyq vokalıster konkýrsy ótip jatyr.
Baıqaýdyń resmı ashylý saltanaty 11 qyrkúıek kúni Abaı atyndaǵy Ulttyq akademıalyq opera jáne balet teatrynda ótti. Konkýrs qyrkúıektiń 17-sine deıin jalǵasady.
«Bıbigúl Tólegenovanyń HII Halyqaralyq vokalıster konkýrsy árdaıym almatylyqtar men onyń qonaqtary úshin úlken merekege aınaldy. Mýzyka – halyqtyń asqaq rýhynyń tili. Endeshe qazaqtyń darhan dalasyn mýzykamen qubylta bilý, qazaq kompozıtorlarynyń qaıtalanbas týyndylaryn sheber oryndaý arqyly halyqtyń rýhanı tilin búgingi býynǵa sińirýmen birdeı. Bul rette Bıbigúl Tólegenovanyń HII Halyqaralyq vokalıster konkýrsynyń halyqtyq mádenıetti, ulttyq klasıkalyq ónerdi kóterýge qosyp kele jatqan úlesi zor», – deıdi baıqaý uıymdastyrýshylary.
Al Lúksembýrgtan arnaıy kelgen júrı múshesi, halyqaralyq konkýrstardyń laýreaty, álemdik opera hanshaıymy Elena Zaremba baıqaý týraly kelesideı pikir bildirdi:
«Bıbigúl Tólegenovanyń Halyqaralyq vokalıster konkýrsy – halyqaralyq jáne joǵary deńgeıli jastar úshin eń klasıkalyq mýzyka baıqaýy. Iaǵnı, bul baıqaý jańa talanttarǵa jol ashady. Qatysýshylarǵa ózderiniń shyǵarmashylyq áleýetin pash etýge múmkindik beredi. Kásibı tájirbıelik turǵyda ózderiniń sheberlikterin shyńdaıtyn, klasıkalyq ónerde joǵary deńgeıge shyǵýǵa jol ashatyn alań, al óner jolyn jańa bastap kele jatqan oryndaýshylarǵa alǵashqy kásibı alań deýge bolady», – dedi ol.
Aıta ketken jón, Qazaqstannyń ár túkpirinen, alys jáne aqyn shetelderden konkýrsqa qatysý úshin Almatyǵa operalyq ónerdegi jas vokalıster jınaldy. 11 elden kelgen qatysýshylardyń sany bıyl sany 73-ke jetti. Talap boıynsha konkýrsqa 1988 jyldyń 1 qazanynan keıin jáne 2004 jyldyń 1 qazanyna deıin dúnıege kelgen azamattar qatysady.
Baıqaý formatyna saı irikteýden ótken qatysýshylar fınaldyq kezeńde óner kórsetedi. Barlyq tyńdaý ashyq ótkiziledi. Oryndaýshylardyń qatysý rettiligi jerebe arqyly anyqtalyp, baıqaý aıaqtalǵansha saqtalady. Fınalǵa jarysta iriktelgen 14 qatysýshy ótedi.
Qatysýshylardyń ónerlerin joǵary mártebege ıe kásibı qazylar alqasy baǵalaıdy. Olardyń qatarynda Italıa, Lúksembýrg, Chehıa, QHR jáne Qazaqstannyń álemdik deńgeıdegi operalyq óner maıtalmandary bar. HII Halyqaralyq vokalıster konkýrsynyń qazylar alqasynyń tóraıymy KSRO jáne Qazaqstannyń Halyq ártisi, Sosıalısik Eńbek Eri, KSRO jáne Qazaqstannyń Memlekettik syılyqtarynyń laýreaty, akademık – Bıbigúl Tólegenova.
Baıqaýdyń uıymdastyrylýyna Qazaqstan Respýblıkasynyń Mádenıet jáne aqparat mınıstrligi, «Mıras» qoǵamdyq ulttyq mádenıet qory» qoǵamdyq birlestigi jáne Almaty qalasynyń ákimdigi úlken qoldaý kórsetip otyr.