Almaty qalasynda jumys berýshiler men bolashaǵy jarqyn jastardyń basyn qosqan TalentforBIZ mansap jármeńkesi ótti.
Qazaqstanda osymen ekinshi ret uıymdastyrylǵan jobany 2019 jyldan bastap Túrkıa Respýblıkasynyń Prezıdenti janyndaǵy Kadr basqarmasy júzege asyryp keledi.
TalentforBIZ – oqý bitirip, qolyna dıplomyn alǵan jas mamandardy jumysqa ornalastyrý múmkindikterin usynyp kele jatqan aýqymdy is-shara. Bul joba bedeldi túrik kompanıalaryna álemdik deńgeıde jumys isteıtin qazaqstandyq jastardy eki elde de jumysqa ornalastyryp, taǵylymdamadan ótý jáne bilim alý sıaqty ártúrli mansaptyq múmkindikterdi usynyp otyr. Osy ýaqytqa deıin álemniń 10 elinde 15 ret ótken shara Qazaqstannan keıin ózge de halyqaralyq ortalyqtarda jalǵasyn tabady.
Jármeńkege jıyrmaǵa jýyq jumys berýshi qatysty. Atap aıtqanda, Turkish Airlines, Túrik aeroǵarysh ónerkásibi, Aselsan, Havelsan, Halk Bankası, Türk Telekom, sondaı-aq Qazaqstanda jumys isteıtin Abdi İbrahim, Esan Eczacıbaşı, Ziraat Bankası jáne Pro Yapı kompanıalary qatysty. Kórmege kelgen jas mamandardyń qabylet-qarymyn qarap, túıindemesin kórgennen keıin bos jumys ornyn usyndy.
Túrkıa Respýblıkasy Prezıdent basqarmasy Mansap ortalyǵynyń basshysy, dosent, doktor Salım Altaı Túrkıadan arnaıy kelip, qatysty. Sondaı-aq, Túrkıanyń Almaty qalasyndaǵy Bas konsýly Evren Múdderesoǵlý jármeńkege qatysqan jumys berýshi mekemelerge alǵysyn bildirip, jastarǵa sáttilik tiledi.
«Osy sharany 2019 jyly dál osy jerde uıymdastyrǵan edik. Ol ýaqyttan beri Almaty qatty ózgergen. Bizdiń maqsat – qazaqstandyq jastardy Túrkıaǵa nemese basqa elge alyp ketý emes. Qazaqstan – bizdiń atajurtymyz, Túrkıa da ekinshi otanymyz sanalady. Jastar arasynda mádenı baılanysty damytý úshin ártúrli sharalar uıymdastyrý kerek. Búgin kúni boıy kompanıalar men jumys berýshiler suhbattasyp,
usynylǵan bos oryndarmen tanysady, óz túıindemelerin qaldyrady. Eki tarapqa da paıdaly bolaryna senemiz», - deıdi Salım Altaı.
Bas konsýl Evren Múdderesoǵlý da Qazaqstan men Túrkıa qoǵamnyń barlyq salasynda, ásirese, bilim berý, saýda jáne ekonomıkada berik baılanys ornatqanyn aıta kele, ekonomıka salasyndaǵy saýda kólemi 1992 jyly nebári 100 mıllıon dollar qurasa, al 2023 jyldyń sońynda 6 mlrd. dollardan asqanyn málimdedi.
«Endigi maqsat – ekijaqsy saýda kólemin qysqa merzim ishinde 10 mlrd. dollarǵa jetkizý.
Atalmysh joba jyl saıyn turaqty túrde uıymdastyrylyp, jaqsy nátıje kórsetip keledi. Álemniń túkpir túkpirinen kelgen talantty jastarǵa halyqaralyq deńgeıde jumys isteıtin túrik kompanıalary týraly aqparat berý úshin ótkiziledi. Bizdiń tanymal jumys berýshi kompanıalarmen suhbattasyp, jarnamalyq kezdesýler uıymdastyrylady. Mekemeler bos jumys ornyn usynyp, jumysqa ornalasýǵa jáne taǵylymdamaǵa ótinimder qabyldaıdy», - dedi Bas konsýl.
Mansap jármeńkesine ózine laıyq jumys izdeı kelgen Madıar
«Jaqynda Túrkıa eline baryp, alty aı tájirıbe jınap keldim. Halyqaralyq qatynastar mamandyǵynda oqımyn. Sondyqtan osyndaı jármeńkelerdiń qalamyzda ótýi men úshin mańyzdy. Bul jerde álemdik deńgeıde tanymal kompanıalarmen jaqynyraq tanysýǵa múmkindik aldym. Jumys berýshilerdiń talaptaryn tyńdap, suhbattastyq. Ázirge eki jumys berýshi mekeme kóńilge qonymdy», - deıdi Turan ýnısersıtetiniń stýdenti Madıar Erlanuly.