Sportpen turaqty aınalysatyn almatylyqtardyń úlesin 2025 jylǵa qaraı 40%-ke deıin kóbeıtý kózdelip otyr.
Almaty qalasyn damytýdyń 2025 jylǵa deıingi baǵdarlamasynda jáne 2030 jylǵa deıingi orta merzimdi perspektıvalarda turǵyndardyń salaýatty ómir saltynyń negizgi quramdas bóligi retinde dene shynyqtyrý men sportty damytýǵa erekshe kóńil bólindi. Bul týraly shahar basshysy Erbolat Dosaev Almatynyń qalasynyń 2023-2025 jyldarǵa arnalǵan búdjet jobasyn qaraý barysynda aıtty, dep habarlaıdy Almaty-akshamy.kz.
Baǵdarlama sheńberinde dene shynyqtyrýmen jáne sportpen turaqty aınalysatyn almatylyqtardyń úlesin 2025 jylǵa qaraı 40%-ǵa deıin kóbeıtý, sondaı-aq 2025 jylǵa qaraı sporttyq ınfraqurylym alańdaryn 55 myń sharshy metrge ulǵaıtý josparlanǵan.
«Máselen, bıyl jalpy aýdany 14,3 myń sharshy metr bolatyn 3 sport kesheni iske qosyldy. 2023 jyly taǵy 3-eýin salý jáne úsh aýdanda sport keshenderiniń jobalaý-smetalyq qujattamalaryn (500 mln. teńge) ázirleý josparlanýda», - dedi Erbolat Dosaev.
Ákimniń aıtýynsha, kóshedegi sporttyq ınfraqurylymdy damytý aıasynda: mobıldi skalodromdar men skeıtparkter, strıtbol, vorkaýt alańdary, Oren Air fıtnes jáne VMH trassalary salynady. Osylarǵa 790 mln. teńge qarastyrylǵan.
«Kelesi jyldan bastap komandalyq sport túrlerinen (fýtbol, basketbol, voleıbol jáne t.b.) stýdentter men mektep lıgalaryn quramyz.Osy sharalardyń barlyǵy halyqtyń sportpen shuǵyldaný deńgeıin arttyrýǵa jáne jabyq sport obektileriniń tapshylyǵyn azaıtýǵa múmkindik beredi»,- dedi Erbolat Dosaev.