Almaty qalasy ákiminiń orynbasary Erjan Babaqumarov megapolıstiń aýmaqtyq Sanıtarlyq-epıdemıologıalyq baqylaý departamentiniń basshysy, bas sanıtarlyq dáriger J. Bekshınmen jáne qalalyq Qoǵamdyq densaýlyq basqarmasynyń basshysy N. Tabynbaevpen birge Almaty halyqaralyq áýejaıy men qala vokzaldarynyń aýmaǵyndaǵy sanıtarlyq epıdemıologıalyq qyzmetterdiń jumysyn tekserdi.
Tekserý barysynda megapolıs aýmaǵyna ınfeksıa taralý jaǵdaılarynyń algorıtmine jáne boldyrmaýdyń aldyn alý jónindegi saqtyq sharalaryna basa nazar aýdaryldy. QR aýmaǵynda koronavırýs ınfeksıasynyń taralýyn boldyrmaý jónindegi Vedomstvoaralyq komısıanyń jáne QR Densaýlyq saqtaý mınıstrliginiń elde "Delta" (úndi) shtamynyń aınalymyna qatysty tapsyrmasyn eskere otyryp, jerústi qyzmetterdiń koronavırýstyq ınfeksıanyń taralýyna qarsy daıyndyǵy, ushý aýmaǵynda ınfeksıa sımtomdaryn anyqtaıtyn jolaýshylar úshin jekelegen ınfeksıalyq bokstardyń jumysy tekserildi.
Áýejaıǵa kire beristegi Ashyq qosymshasy arqyly testileýge de nazar aýdaryldy. Kúzet qyzmetine orta eseppen áýejaıǵa kire beriste «qyzyl» mártebege ıe eki-úsh jolaýshy tirkelgeni týraly habardar etildi. Infeksıanyń odan ári taralýyna jol bermeý úshin bul adamdarǵa jedel sharalar qabyldanýda.
Áýejaı bazasynda aeroport bólimsheleri basshylyǵy men ókilderiniń qatysýymen koronavırýstyq ınfeksıanyń taralýyn boldyrmaý jónindegi qalalyq shtabtyń kóshpeli otyrysy ótti.
Áýejaıdy baqylaý qorytyndysy boıynsha áýe aılaǵy basshylyǵy men bólimshe ókilderiniń qatysýymen koronavırýstyq ınfeksıanyń taralýyna jol bermeý jónindegi qalalyq shtabtyń otyrysy ótti.
Epıdemıologtardyń aıtýynsha, "Delta" shtamy joǵary juqpaly ári anyqtalǵan shtamdarǵa qaraǵanda 60%-ǵa juqpaly. Ortasha alǵanda, bir adamnan 5-6 adam juqtyrady, al aınalymdaǵy shtamdardan 3-4 adam. Shtamnyń ınkýbasıalyq kezeńi jeti kúndi quraıdy. Ǵalymdardyń zertteýleri koronavırýstyń úndilik shtamynan aýrýhanaǵa jatqyzý men ólim-jitimniń yqtımaldyǵy joǵary ekenin aıtty.
J. Bekshın úndi shtamynyń sımptomdary basqa, úırenshikti shtamdardan ózgeshe dedi. Mysaly, ıis sezý bolmaýy múmkin. Alaıda, aýrýdyń belgileri bolǵan kezde dereý dárigerdi shaqyrýyńyz kerek, óıtkeni jańa shtam qaýipti. Osyǵan baılanysty qala turǵyndary ózin-ózi emdeýmen aınalyspaýy kerek".
Ákimniń orynbasary E. Babaqumarov Sanıtarlyq-epıdemıologıalyq qorǵaýdyń barlyq sharalaryn kúsheıtýdi, onyń ishinde áýejaı qyzmetkerlerin vaksınalaýǵa shaqyrdy. Sondaı-aq áýejaıdy dezınfeksıalaý jumystary jalǵasatyn bolady.
Aıta ketsek, Almaty epıdemıologtary qaýipti "Delta"shtamynan týyndaýy múmkin koronavırýstyq ınfeksıanyń jańa tolqynyn joqqa shyǵarmaıdy. Almaty qalasynyń koronavırýstyq ınfeksıanyń taralýyna jol bermeý jónindegi qalalyq shtaby turǵyndardy vaksınalaýǵa, sondaı-aq betperde rejımi men áleýmettik qashyqtyqty saqtaýǵa shaqyrdy.
Eske salsaq, Dúnıejúzilik densaýlyq saqtaý uıymynyń málimetteri boıynsha, 20 maýsymdaǵy jaǵdaı boıynsha, SARS-CoV-2 "Delta" shtamy álemniń 74 elinde anyqtaldy.