Ábilhan Qasteev atyndaǵy QR Memlekettik óner mýzeıinde QR Sýretshiler odaǵynyń halyq sýretshileri Ábilhan Qasteevtiń 120 jyldyǵyna, Úki Ájıevtiń 100 jyldyǵyna, Naǵymbek Nurmuhammedovtyń 100 jyldyǵyna, Gúlfaırýz Ismaılovanyń 95 jyldyǵyna arnalǵan «ULAǴATTY URPAQ» atty Respýblıkalyq eseptik kórmesi ashyldy.
Kórmede 200-den astam keskindeme, grafıka, músin, qolóner salasy boıynsha qazaqstandyq sýretshilerdiń shyǵarmashylyq týyndylary usynyldy. Respýblıkalyq kórmege Almaty, Almaty oblysy, Astana, Pavlodar, Kókshetaý, Petropavl, Aqtóbe, Atyraý, Oral, Qyzylorda, Taraz, Túrkistan, Shymkent óńirinen 150-ge jýyq sýretshiler qatysyp otyr.
Qazaqstan sýretshileri mańyzy men máni joǵalmaǵan qazaq beıneleý óneri qaı zaman bolsa da ulttyq qasıettiń bolmysyn, ondaǵy dúnıetanymdyq dástúrli kózqarasty saqtap keledi. Qazaq beıneleý óneriniń órken jaıyp, álemdik ónerdiń arenasynda ulttyq tilmen tanylýymyzǵa sýretshilerimizdiń sińirgen eren eńbegi orasan dep bilemiz.
Qazaq beıneleý óneriniń qalyptasýy men damýyna qosqan úlesin, ózindik jeke tulǵalyq qoltańbasymen óner tarıhynda iz qaldyrǵan sańlaqtardyń mereıtoılaryna oraı kórmeni uıymdastyrýdyń negizgi mindetteri:
Búgingi tańda HHİ ǵasyrdyń sýretshileri ulttyq óner mektebiniń damýyna qandaı úles qosýda;
- Qazirgi tańdaǵy qoǵam ómirindegi komersıalyq quramdas bólikten arylý jáne jańa mindetterdi ashý, ózekti plasıkalyq ıdeıalardy qalyptastyrý;
- Adam men qoǵam arasyndaǵy ózindik damýynyń jańa tarıhı kezeńine shyǵý mańyzdylyǵy.
— Atalmysh kórmeniń tujyrymdamasyna sáıkes, sýretshiler shyǵarmashylyǵyndaǵy týyndylarda ýaqyt pen keńistik aǵymynyń aqıqaty, ulttyq rýhtyń tynysy, eldiń maqsat-muraty baıandalady. Ekspozısıada kórermen túrli janrda ár qyrynan kórinis tapqan, kompozısıalyq jáne kolorıttik sheshimde, kreatıvti oı-tujyrymda aıqyndalǵan dınamıkalyq úndestik pen ózara tutas, tereń maǵynaly týyndylardyń kýási bola alady, — deıdi kórme jetekshisi Gúlnar Jubanıazova.
Kórme jeltoqsannyń 13-ine deıin jalǵasady.