«Halyq qatysatyn búdjet» jobasy aıasynda jergilikti búdjet qarajaty esebinen qalalyq ortany damytý boıynsha ótinimderdi qabyldaý bastaldy.
30 naýryzdy qosa alǵanda budget.open-almaty.kz ınternet-portal arqyly qala turǵyndary óz aýdanyn (shaǵyn aýdan, aýla jáne t.b.) abattandyrý boıynsha jobalyq usynystaryn bere alady, dep habarlaıdy Almaty-akshamy.kz.
Jobanyń krıterııleri men talaptaryna sáıkes keletin, sondaı-aq daýys berý kezeńinde Almaty turǵyndarynyń eń kóp daýys jınaǵan ıdeıalary men bastamalaryn ákimdik aǵymdaǵy 2023 jyly iske asyratyn bolady. "Halyq qatysatyn búdjet" jobasyn qarjylandyrýdyń qosymsha somasy 7 mlrd teńgeni quraıdy.
Jobalyq usynystar mynadaı 9 sanat boıynsha qabyldanady: kógaldandyrý; trotýarlardy jaılastyrý; trotýarlardy, pandýstardy, aryqtardy salý jáne jóndeý; Jalpyǵa ortaq paıdalanylatyn oryndardy (saıabaqtardy, skverlerdi, jaıaý júrginshiler aımaqtaryn, kóshelerdi jáne ózge de obektilerdi) qurý, jóndeý jáne jaryqtandyrý; bordúrlerdi, tósenishterdi, tireý qabyrǵalaryn jóndeý; polıgondardy joıý; balalar oıyndary men eresek turǵyndardyń demalysyna arnalǵan oryndyqtardy, ýrnalardy, jabdyqtar men konstrýksıalardy jalpy paıdalanylatyn oryndarǵa ornatý jáne jóndeý; sport alańdaryn (trenajer alańdaryn, fýtbol, basketbol, voleıbol alańdaryn), aýla aýmaqtarynda jáne jalpy paıdalanylatyn oryndarda balalar oıyn alańdaryn ornatý, jóndeý jáne jaryqtandyrý; sanıtarıany qamtamasyz etý.
Jobalyq usynystar budget.open-almaty.kz. portaly arqyly qabyldanady, ol úshin ótinimdi (jobalyq usynystyń ataýy, onyń sıpattamasy, meken-jaıy/ornalasqan jeri) toltyryp, jobalyq usynystyń baǵdarly fotosýretin/nobaıyn/sqemasyn jáne smetasyn tirkeý qajet (ınternetten nemese kez kelgen basqa ashyq kózderden úlgi nobaılarǵa nemese esepteýlerge jol beriledi). Bir jobalyq usynystyń eń joǵary quny 86,2 mln teńgeden (25 myń AEK) aspaýǵa tıis.
Barlyq ótinimder qabyldanǵannan keıin, árbir aýdan ákimdigi janynan máslıhat depýtattarynyń, Almaty qalasynyń qoǵamdyq keńes músheleriniń, sáýletshilerdiń, qurylys salasyndaǵy mamandardyń qatysýymen saraptamalyq keńester qurylady. Baǵalaý barysynda usynystar daýys berýge jiberilýi, pysyqtaýǵa jiberilýi nemese jobalardy irikteý krıterıılerine sáıkes kelmeýine baılanysty qabyldanbaýy múmkin. Árbir joba boıynsha aqparat aldyn ala ruqsat berý hattamalarynda kórsetiledi jáne aýdandyq ákimdikter budget.open-almaty.kz. portalynda jarıalaıdy. Pysyqtaý qajet bolǵan jaǵdaıda, usynys avtoryna elektrondyq poshtaǵa habarlama jiberiledi. Budan ári, avtorlar pysyqtaǵan usynystardy qaraý nátıjeleri boıynsha aýdan ákimdikteri budget.open-almaty.kz portalynda ruqsat hattamalaryn jarıalaıdy.
Jobaǵa qatysýshylardyń yńǵaılylyǵy úshin portalda "Daýys berý" bóliminde onlaın-daýys berý qoljetimdi, onda Sizge ózińizge unaǵan 3-ten aspaıtyn jobalyq usynystardy tańdap, ESQ nemese JSN (SMS-kod) kómegimen óz daýysyńyzdy rastaýǵa bolady. Kelesi kezeńde aýdan ákimdigi daýys berý qorytyndylarynyń hattamasyn qalyptastyryp, portalda ornalastyrady, onda jiberilgen jobalardyń sany jáne árbir joba boıynsha daýys bergen azamattardyń sany týraly tolyq aqparatty kórsetedi. Osydan keıin búdjettik zańnamaǵa sáıkes jobalyq usynystardy iske asyrý boıynsha búdjettik ótinimder qalyptastyrylady.
Aýdandyq ákimdikter jobalyq usynystardy iske asyrý barysy jáne qorytyndylary týraly aqparatty budget.open-almaty.kz portalyndaǵy "Jobalar boıynsha materıaldar" bóliminde ornalastyrady.
Jobalyq usynys krıterııleri:
- bir avtor – bir ótinim – bir joba;
- nysan qol jetimdilikti shektemeı, jalpy paıdalanýda bolýy kerek;
- obektiniń ornalasqan jeri ony iske asyrý josparlanǵan aýdan aýmaǵynda, jalpy paıdalaný ýchaskesinde bolýy tıis;
- ákimdik quzyreti sheginde bolýy mindetti;
- Almaty turǵyndary úshin ózektiligi.
Jobalyq usynystar qabyldanbaıdy, eger:
- qurylys-montajdaý jumystaryn júrgizbesten, tek jobalaý-smetalyq qujattamany ázirleýge eseptelse;
- bolashaqta qosymsha elementterdi iske asyrýdy talap etse;
- Almatynyń damý basymdyqtaryna sáıkes kelmese;
- jeke komersıalyq sıpatqa ıe bolsa jáne t. b.
Esterińizge sala keteıik, 2023 jyly "Halyq qatysatyn búdjet" jobasy besinshi ret júzege asyrylýda. Almatyda alǵash ret ol 2019 jyldyń tamyzynda iske qosyldy. 2022 jyly 1251 usynys kelip tústi, onyń 205-i 2023 jyly iske asyrýǵa maquldandy, jalpy somasy 8,5 mlrd teńgeni quraıdy. 2022 jyldyń eń qyzyqty jobalarynyń ishinde mynalardy atap ótken jón:
- Almaty qalasy Jetisý aýdany, Chernovıskaıa kóshesindegi Esentaı ózeniniń boıyndaǵy jaǵalaýdy jaılastyrý.
- Almaly aýdanyndaǵy Bógenbaı batyr býlvaryn abattandyrý (Sharıpovodan Baıtursynovqa deıin).
- Medeý aýdanyndaǵy Qadamdardy aǵymdaǵy jóndeý Kereı Jánibek handar kóshesi, 29.
- Medeý aýdanyndaǵy Tıksaı ózeniniń jaǵalaýyn abattandyrý.
Almaly aýdanynyń turǵyndarymen kezdesý barysynda Almaty ákimi Erbolat Dosaev "Halyq qatysatyn búdjet" baǵdarlamasyn iske asyrýǵa 2023 jyly qosymsha 7 mlrd teńge bólinetinin habarlady. Bul sheshim osy baǵdarlamanyń tıimdiligin eskere otyryp qabyldandy. Qosymsha qarajat qalanyń segiz aýdanyna bólinedi. Jalpy, qarjylandyrý 1,8 esege ulǵaıtylady.
"Halyq qatysatyn búdjet" boıynsha konsýltasıany Almaty qalasynyń aýdandyq ákimdikterinen, sondaı-aq Almaty ákimdiginiń Open Almaty qoǵamdyq qabyldaý bólmesinen 224 39 29 (ishki.203), 1308 alýǵa bolady.