Kórme áıel beınesine jáne qazaq halqynyń erlikke toly ótken tarıhyna arnalǵan.
Ábilhan Qasteev atyndaǵy QR Memlekettik óner mýzeıinde Gúlmaral Tátibaevanyń «Saǵynysh» atty jeke kórmesi ashyldy, dep habarlaıdy Almaty-akshamy.kz.
Kórme áıel beınesine jáne qazaq halqynyń erlikke toly ótken tarıhyna arnalǵan. Avtor bul taqyryptardy jan-jaqty, kóp qyrly maǵynada qarastyrady. Ekspozısıada elýden astam týyndy usynylǵan. Olardyń arasynda ınstallásıa, keskindeme, grafıka bar. Bul sýretshiniń onynshy jeke kórmesi.
«Men ana sútimen halqymyzdyń mádenı qundylyqtaryn sińirip, ósken qazaq otbasynda dúnıege keldim. Bul týraly oılana otyryp, men qazaq áıeliniń jınaqtalǵan beınesinde qıyn-qystaý zamanda ómir súrýge múmkindik beretin qasıetterdiń shoǵyry bar degen qorytyndyǵa kelemin» deıdi kórme avtory.
Kórermenderdiń nazaryna «Great QAMZOL» jáne «Ańyz» taqyryptyq tujyrymdamasymen úndesetin eki ınstallásıa usynyldy. Bul jumystarda áıel beınesi kúsh pen tózimdiliktiń ıesi retindegi beınelengen.
«Bul ınstallásıany jasaý úshin meni ómirdegi eren eńbegimen tań qaldyratyn áıelder shabyttandyrdy. Meniń jolymda olar kezdeısoq kezdesken joq dep oılaımyn. Olardyń barlyǵy batyldyq, joǵary rýhanı jáne sonymen birge bıazylyq, tereń danalyq pen janqıarlyq qasıetterdiń úlgisi. Men bul kezdesýler úshin taǵdyryma alǵysym sheksiz. Men olardyń beınelerin aq kenepterge túsirgim keldi. Qazaq halqynyń tús sımvolızminde aq tús – joǵary álemniń túsi, tazalyq pen senimniń túsi. Dáp osy aq matadan qazaq sheberleri áıelderdiń bas kıimi – kımeshekti tikken, - deıdi Gúlmaral Amangeldiqyzy.
Bul keskinderdi jasaý úshin sýretshi sıanotıp tehnıkasyn qoldanady. Gúlmaraldy qaıyń qabyǵynyń baı qurylymy, túrli-tústi reńkteri, onyń keń sándik múmkindikteri shabyttandyrady.
Gúlmaral óziniń shyǵarmashylyǵy arqyly ata-babalarynyń basyna túsken surapyl taǵdyrynyń tarıhyn jetkizýge tyrysady.
Tátibaevanyń shyǵarmalary respýblıkamyzdyń, taıaý jáne alys shet elderdiń mýzeılerinde jáne jeke koleksıalarynda saqtaýly. Kórme 2023 jylǵy 7 maýsymǵa deıin jalǵasady.