Almatyda Qazaq qurylys jáne sáýlet ǵylymı-zertteý jáne jobalaý ınstıtýtynyń bastamasymen dóńgelek ústel uıymdastyrylyp, onda elimizdegi qurylys salasynda halyqaralyq standarttardy, onyń ishinde FIDIC qurylys kelisimshartynyń standartty túrlerin qoldaný máselesi qaraldy, dep habarlaıdy Almaty-akshamy.kz.
Atalǵan is-sharaǵa otandyq bıznes pen memlekettik organdardyń ókilderi qatysqanyn atap ótken jón.
FIDIC proformalary – halyqaralyq ınvestısıalyq qurylys salasynda naryq qatysýshylarynyń baılanysyn rettep, barlyǵynyń múddesin teń jaǵdaıda saqtaý úshin Halyqaralyq ınjener-konsýltanttar qaýymdastyǵy ázirlegen biregeı qurylys kelisimsharttary sanalady.
«QazQSǴZI» AQ-nyń bas dırektory Begman Qulbaevtyń aıtýynsha, elimizde osy saladaǵy ózekti máselelerdi, aıtalyq avtorlyq jáne tehnıkalyq qadaǵalaýdy, sondaı-aq jekelegen ınjenerlik qyzmetkerlerdiń mártebesin naqtylap, barlyq taraptyń múddesin teń jaǵdaıda saqtaý úshin qazir jańa Qala qurylysy kodeksi ázirlenip jatyr. Bul - egemen elimizdiń tarıhynda qurylys salasyndaǵy tuńǵysh keshendi zańnamalyq akt.
Osy oraıda BI Construction & Engineering kompanıasynyń operasıalyq máseleler jónindegi basqarýshy dırektory Darhan Rahımov jańa zań merdiger uıymdardyń da múddesin qorǵaıdy degen senimde.
Qurylystaǵy ınjener-keńesshiler ulttyq qaýymdastyǵynyń (QIKUQ) bas dırektory Olga Kýbanskaıa aıtqandaı, FIDIC kelisimsharttaryn oryndy qoldaný úshin sondaı úlgidegi kelisimsharttarmen jumys isteıtin mamandar qoldanystaǵy zań men ádettegi normalardyń arasyndaǵy aıyrmashylyqty ajyrata bilýi tıis. «FIDIC kelisimsharttaryna sáıkes júzege asyrylatyn jobalar basqarýdyń tyń tásilin qajet etedi», dedi O.Kýbanskaıa.
Bul rette sarapshylar TMD elderinde atalǵan kelisimsharttardyń qoldaný tájirıbesin odan ári damytý úshin shetelden FIDIC boıynsha sertıfıkattalǵan mamandardy tartýdan bólek, sondaı-aq jergilikti ınjenerler men jobalaý menedjerlerin daıyndaýǵa kóbirek kóńil bólý kerek dep sanaıdy. Onyń ishinde ýnıversıtetter men kásiptik bilim berý oryndarynda mamandardy sapaly daıarlaýǵa basymdyq berý qajet degen ortaq pikirge keldi qatysýshylar.
Aıta keteıik, elimizde FIDIC standarttary boıynsha qajetti keńesti «Qazaqstandyq ulttyq kásibı ınjenerler men keńesshiler qaýymdastyǵy» ZTB (KIKQUQ ZTB) berip keledi.