Bul týraly Almaty máslıhatynyń kezekti sesıasy barysynda qalalyq qarjy basqarmasynyń basshysy Qanat Sýhambekov málimdedi.
Almatynyń 98 mlrd teńge somasyna jergilikti búdjetin naqtylaý ótken jyldan bergi bos qaldyqtardy paıdalaný jáne búdjettik baǵdarlamalar ákimshileri arasynda búdjet qarajatyn ishki qaıta bólý esebinen júrgiziledi, dep habarlaıdy Almaty-akshamy.kz
Sondaı-aq, Almaty ákimi Erbolat Dosaevtyń tapsyrmasy boıynsha festıváldar, forýmdar men túrli ımıjdik is-sharalardy ótkizýge shyǵyndar qysqartyldy.
«Áleýmettik salaǵa 2024 jylǵy búdjet shyǵystarynyń 31% - y baǵyttalýda-bul 30,4 mlrd teńge. Bilim berý salasyna 20,8 mlrd teńge qarastyrylǵan, ol 13 mektepke ınjenerlik-kommýnıkasıalyq ınfraqurylym men talshyqty-optıkalyq baılanys jelilerin salýǵa, Shuǵyla sh/a týberkýlezdiń belsendi emes túrimen aýyratyn balalarǵa arnalǵan sanatorıı úlgisindegi jataqhanasy bar 340 oryndyq jańa mektep salýǵa, Almaty telekomýnıkasıa jáne mashına jasaý kolejin jańartýǵa, sondaı-aq №58, 73, 83 mektepterdi jáne respýblıkalyq fızıka - matematıka mektebiniń ǵımaratyn rekonstrýksıalaýǵa arnalǵan», - dep qosty Qanat Sýhambekov.
Budan basqa, aǵymdaǵy jyly Almaly, Bostandyq, Alataý jáne Medeý aýdandaryndaǵy 5 mektepti kúrdeli jóndeýmen seısmıkalyq kúsheıtýge qosymsha 2,7 mlrd teńge kózdeletin bolady. Naýryzbaı aýdanyndaǵy Shuǵyla, Quramys shaǵyn aýdandarynda árqaısysy 320 oryndyq 2 balabaqsha qurylysy jalǵasady.
«Densaýlyq saqtaý salasynda uzaq ýaqyt ishinde alǵash ret 11 nysanǵa kúrdeli jóndeý júrgiziletin bolady. Bul maqsattarǵa búdjetten 5,6 mlrd teńge qarastyrylǵan. Mádenıet jáne sport salasyn damytýǵa 3,3 mlrd teńge qarastyrylǵan.», - dep túıindedi sózin Almaty qalasy qarjy basqarmasynyń basshysy.