Almatyda farmasevter quramynda esirtkisi bar dárilerdi reseptsiz satqan.
Dárihana nashaqorlyǵymen tek polısıa qyzmetkerleri ǵana emes, dárihana esirtkilerin satatyn oryndar jaıly belgi berip otyrǵan Almaty turǵyndary da belsendi túrde kúresýde, dep habarlaıdy Almaty-akshamy.kz Polisia.kz-ke silteme jasap.
«Habar túskennen keıin bizdiń bólimsheniń qyzmetkerleri Áýezov aýdandyq PB-ǵa qarasty PB-nyń áriptesterimen birlesip júrgizgen jedel is-sharalar barysynda tropıkamıd preparatyn reseptsiz satý deregi anyqtaldy. 48 jastaǵy I. esimdi azamat jáne osy dárihananyń farmasevti ustaldy. Al qalanyń Jetisý aýdanynda aldyn alý sharalary aıasynda dárihana esirtkisin satýdyń taǵy bir deregi anyqtaldy. Munda 43 jastaǵy Alataý aýdanynyń turǵyny Sh. esimdi azamat ustaldy. "Aınabulaq" yqshamaýdanynda ornalasqan dárihananyń farmasevti reseptsiz 3 dana kólemindegi SAMNOL preparatyn bergen», – dedi Almaty qalalyq PD Esirtki qylmysyna qarsy kúres basqarmasynyń bastyǵy Erlan Álmaǵambetov.
Spıkerdiń aıtýynsha, satýshylar men satyp alýshylar jaýapkershilikke tartyldy. Dárilik zattardy reseptsiz satý deregi QR ÁQBtK-niń 426-baby boıynsha tirkeldi.
Quramynda esirtkisi bar preparattardy zańsyz satý jáne reseptsiz satý derekterin anyqtaý boıynsha turaqty túrde reıdter júrgizilip jatqanyn atap ótkim keledi. Qazir mundaı dárilerdi taratqany úshin jaýapkershilikti kúsheıtý boıynsha birqatar usynystar ázirlenýde, – dedi Álmaǵambetov.