2025 jyly Almaty qalasy boıynsha kohlearly ımplant ornatý operasıalaryna 2,3 mlrd teńge qarastyrylǵan.
Bıylǵy jyldyń bastapqy 5 aıynda qulaq múkisimen týǵan balalarǵa MÁMS sheńberinde osyndaı 36 qymbat ota jasaldy. Oǵan Qor 283 mln teńgeden astam qarjy tóledi.
Medısınalyq saqtandyrý qory Almaty qalalyq fılıalynyń baspasóz qyzmeti habarlaǵandaı, 2024 jyly kómektiń bul túri 277 balaǵa kórsetilip, oǵan jalpy 2,1 mlrd teńge tólengen. Árbir otanyń quny orta eseppen alǵanda 8 mln teńgege jetip jyǵylady.
"Kohlearly ımplanttaý — eki qulaǵy birdeı estimeıtin balalardyń estý qabiletin qalpyna keltirýge baǵyttalǵan joǵary tehnologıalyq ota. Mindetti áleýmettik medısınalyq saqtandyrý (MÁMS) júıesiniń arqasynda mundaı qymbat ári kúrdeli operasıalar Almatyda tegin jasalyp jatyr", - delingen habarlamada.
Operasıany kimder jasata alady?
Bul prosedýra IV dárejeli eki jaqty kereńdikke shaldyqqan, estý apparattarynyń kómegi tımeıtin balalarǵa jasalady. Dıagnoz qanshalyqty erte anyqtalyp, ota meılinshe erte jasalsa balanyń tolyqqandy sóılep, áleýmettik ortamen aralasyp ketý múmkindigi de sonshalyqty joǵarylaıdy, deıdi mamandar.
Anar men Aılınniń oqıǵasy
Anar esimdi kelinshek pen onyń qyzy Aılınniń basynan keshken oqıǵa zamanaýı medısınanyń adam ómirin qanshalyqty ózgerte alatynynyń aıqyn dáleli. Aılınge dárigerler kereńdiktiń aýyr túri degen dıagnoz qoıyp, kohlearly ımplant ornatýdy usynǵan. Ota jasatyp, medısınalyq qyzmettiń barlyq deńgeılerinen ótý úshin otbasy Qaraǵandydan Almatyǵa qonys aýdarypty. Ońtústik astanadaǵy №5 Qalalyq klınıkalyq aýrýhana dárigerleriniń kómegine júginip, portal arqyly salalyq klınıkaǵa jatypty.
«Men áýelde osyndaı qymbat otany tegin jasatýǵa bolady degenge sengen joqpyn. Qazir qyzymnyń qulaǵy estıdi, sóıleseń qaraıdy, sóıleýdi de aqyryndap úırenip jatyr. Bul bizdiń otbasymyz úshin úlken baqyt», — deıdi Anar.
Ota qaıda jasalady?
Almaty qalasynda kohlearly ımplantty eki klınıka ornatady:
1. №5 Qalalyq klınıkalyq aýrýhana
2. «S.D.Asfendıarov at. QazaqUMÝ» KEAQ «Aqsaı» balalar ortalyǵy
Klınıkalardyń ekeýi de tıisti qondyrǵylarmen jabdyqtalǵan, kardıohırýrgterden bastap, logoped, aýdıolog syndy mamandarmen qamtamasyz etilgen.
Operasıa jasatý úshin ne isteý kerek?
1. Emhanadaǵy ýchaskelik dárigerge nemese LOR mamannyń keńesine jazylý qajet;
2. Aýdıometrıa, KT, MRT syndy zertteýlerden ótip, sýrdolog mamannyń qorytyndysyn alý kerek;
3. Qujattardy tolyq jınap bolǵan soń emhana mamandary naýqasty «Aýrýhanaǵa jatqyzý búrosy» portalyna tirkeıdi;
4. Aýrýhana rastaǵannan keıin pasıent ózi tańdaǵan klınıkaǵa jiberiledi.
Dıagnostıkadan bastap medısınalyq ońaltýǵa deıingi aralyqtaǵy qyzmettiń barlyq túrleri MÁMS qarajaty esebinen tólenedi.
«Buryn múgedek degen atqa tańylyp, ortadan qalyp qoıatyn balalardyń damyp, estip, sóılep, bala-baqsha men mektepke baryp júrgenin kórip júrmiz. Bastysy – ata-analar ýaqytty tekke ótkizip almaı, der kezinde joldama alsa bolǵany. Operasıadan keıin bala uzaq merzimdik reabılıtasıadan ótedi. Ol klınıkalar da osy Almaty qalasynda ornalasqan», - deıdi Almaty qalasynyń shtattan tys bas sýrdology Naılá Tólepbekova.