Neırojelíníń múmkíndíkterí tańǵaldyrudan jalyqpaıdy. Áleumettík jelíde jasandy ıntellekt arqyly jasalǵan túrlí suretter, vıdeolar keńínen tarap jatyr. TikTok-ta shynaıy vıdeodan aumaıtyn qazaq ájeleríníń túrlí beınelerí qysqa uaqyt íshínde memge aınaldy. Ádette bauyrsaq písíríp, nemeresíne ertegí oqyp, zamandastarymen áńgíme aıtatyn ájeler endí ǵarysh kemesíne míníp, januarlarmen dos bolyp júr. Jelíní jarǵan JI múmkíndíkterí jaıly Aqshamnews.kz tílshísíníń materıalynan bílíńíz.
"Osy jastar úlkenderge oryn bermeıdí, nege?"
Vıdeony bír kórgen adam shynaıy dep oılap qalady. Sebebí dál myna beınedegí oryn sūrap tūrǵan ájelerdíń aıhaıy ómírde jıí kezdesetín jaǵdaı. Ony tek sóılegen sózínen ajyratuǵa bolady.
Vırusqa aınalǵan myna rolık 4,6 mıllıon qaralym jınaǵan. Vıdeony jelí qoldanushylary memge aınaldyryp qaıta túsíríp, ūqsas nūsqalaryn da shyǵaryp úlgergen. Al píkírler bólímíndegí jastar oryn sūraıtyn úlkenderge shamdanyp, túrlí píkírler qaldyrǵan.
Vegetarıan-arystan men áje
TikTok-ta eń kóp taraǵan taǵy bír rolıktíń keıípkerí - shóp jeıtín "Murka" esímdí arystan. Vıdeoda ūlttyq kıím kıgen ájeı kílem ústínde otyryp, qasynda tūrǵan alyp arystanǵa qyryqqabat jegízíp, úıretíp jatyr.
"Men Murkany qyryqqabat jeuge úıretíp júrmín. Áıtpese maldan mal qalmady. Endí Murka - vegetarıan bolady", – deıdí JI áje.
"Murkanyń" rolıgí 1,7 mıllıon qaralym jáne myńdaǵan píkírler jınaǵan. Olardyń arasynda "shynaıy vıdeodan aumaıdy", "shyn eken dep qaldym" degender kóp.
Zymyrandaǵy orynǵa talas
Taǵy bír vıdeoda ájeı zymyranǵa kíríp kelíp, ǵaryshkerge "oryn ber" dep dúrse qoya beredí.
"Osy jastar zymyranda da oryn bermeıdí. Tūr ornyńnan, men otyram!" – dep ashulana sóıleıdí.
Jelí qoldanushylary būl kórínístí kóríp, tańdanystaryn jasyrmady. Olar orynǵa talasatyn ájeılerdíń zymyrannan tabylǵanyna kúle qarap, túrlíshe píkír jaudyrdy.
"Men traktor aıdaǵanmyn, ūshaq degen ne táıírí?"
JI vıdeolaryn jasaǵyshtar avtobusta oryn sūraıtyn ájelerden ábden sharshaǵan syńaıly. Būl rolıkte de ájeı ūshaq pılotyna kelíp taǵy da oryn sūraıdy.
"Jastar ūshaqta da oryn bermeıdí. Ket bar, men júrgízemín ūshaqty. Men traktor aıdaǵanmyn, ūshaq degen ne táıírí" deıdí áje rolıkte.
Rolıkter óte shynaıy shyqqan: ūshaqtyń kabınasy da ómírdegídeı, sóılep jatqan adamdardyń da dausy – tírí adamdíkíndeı, al erínderíníń qımyly mátínmen tolyq sáıkesedí. Jelí qoldanushylaryn osy shynaıylyq baurap aldy. Olar rolıkterden ózderíníń jaqyndaryn, tuǵan ájelerín kóríp, vıdeony bólísíp, típtí óz stsenarıılerín oılap tauyp jatyr. Būdan neırojelíler adamnyń sóıleu mánerí men dauys erekshelígín barǵan saıyn sheber kóshíruge kírískení baıqalady.
Būl vıdeolardyń avtory kím?
Vırusqa aınalǵan vıdeolardyń kóbí Senimgo paraqshasynda jarıyalanǵan. Al onyń avtory - Erkín esímdí azamat. Aqshamnews.kz tílshísíne bergen sūhbatynda ol jasyn, qaı jaqtan ekenín jasyryp qaludy jón kórdí. Bíraq trendke aınalǵan vıdeolarynyń qalaı taraǵany jaıly áńgímelep berdí.
"JI salasyna 2019 jyldan berí qyzyǵamyn. Qazír 10-nan astam JI qūralyn qoldanamyn. Ár vıdeony jasau úshín VEO-dan bólek, auyr modelderdí de paıdalanamyn. JI 100% sen qalaǵanyńdy ístep bermeıdí. Keı tūstary míndettí túrde qolmen jasalady. Barlyǵyn óz betímmen, ınternettegí tegín resurstar arqyly úırendím", – deıdí Erkín.
Onyń aıtuynsha, qazírgí tańda JI arqyly jasalatyn vıdeolar jarnama men kıno óndírísíne deıín qoldanylyp júr. Bíraq sapaly kontentke jetu úshín tek qūraldar emes, ıdeya men qol eńbegí de mańyzdy. Ol aı saıyn JI qūraldary úshín 500 dollar jūmsaıtynyn aıtty.
"Ájelerdíń sózímen mem jasau - tosynnan tuǵan ıdeya"
Erkínníń TikTok-taǵy eń kóp taralǵan vıdeolary – jasandy ıntellektpen jasalǵan "ájelerdíń" jastarǵa aıtatyn keńesterí.
"Mysaly, avtobus íshíndegí 'Jastar nege oryn bermeıdí?' degen vıdeonyń sonsha tanymal bolaryn kútpedím. Bíraq ol memge aınalyp kettí. Sebebí TikTok-ta jastardy jıí kóremíz, al ájelerdíń sol stılde sóıleuí - erekshe kórínedí. Būl – kórermen nazaryn tartatyn basty sebepterdíń bírí", – deıdí ol.
Búgínde keı adamdar shynaıy áje beınesín de JI dep oılaıtyn bolǵan. Erkín būl formattan adamdar jalyǵuy múmkín ekenín túsínedí, sondyqtan bolashaqta jańa ıdeyalar ízdeuge daıyn ekenín aıtady.
"Men vıdeolardyń barlyǵyn jalǵyz ózím jasaımyn. Komandam joq. JI – shabyt beretín myqty qūral, bíraq ony dūrys paıdalanu – adamǵa baılanysty", – dep túıíndedí avtor.