Almatyda «Taza Qazaqstan» jalpyulttyq baǵdarlamasy men qalalyq «Almaty – bizdiń ortaq úıimiz» naýqany aıasynda «Bizdiń qala – bizdiń maqtanyshymyz» atty sońǵy apta bastaldy, dep habarlaıdy aqshamnews.kz
Bul kezeń 24 naýryzdan 1 sáýirge deıin jalǵasady. Bastama aıasynda qalany kórkeıtý, tarıhı-mádenı mura nysandarynyń aýmaǵyn keshendi tazalaý, sondaı-aq 160 qala eskertkishteri men músinderin tazartý jumystary josparlanǵan.
«Qasbetten qasbetke deıin» atty kóshe tazalaý aksıasy, jalǵyzbasty zeınetkerler men múmkindigi shekteýli jandardyń aýlalaryn tazalaýǵa baǵyttalǵan «Jaqynyńa járdemdes» qaıyrymdylyq sharasy jáne aǵash otyrǵyzý boıynsha jergilikti senbilikter jalǵasýda.
Fınaldyq kezeń aıasynda qala turǵyndaryna arnalǵan «Jasyl aýla» kóshetter taratý aksıasyna ótinim qabyldaý bastalady. Kópqabatty úılerdiń aýlasy men qoǵamdyq oryndardy kógaldandyrýdy qalaıtyn kez kelgen adam tegin kóshet ala alady. Tolyq aqparatty www.almaty.kz saıtynan kórýge bolady.
Aıta keteıik, «Almaty – bizdiń ortaq úıimiz» naýqany 1 naýryzdan 1 sáýirge deıin ótýde. Osy ýaqyt ishinde Almatyda 4 myńnan astam aýla aýmaǵyn, 445 qalalyq saıabaq pen skverdi, 2 myńnan astam kósheni tazalaý, 600-den astam zańsyz saýda nysanyn súrý, 3 myńnan astam qoqys jáshigin ornatý, 10 myńnan astam aǵash pen buta otyrǵyzý josparlanǵan.
Sonymen qatar, naýqan aıasynda túrli baıqaýlar men bastamalar júzege asyryldy. «Qorshaýyńdy/oryndyǵyńdy/besedkańdy boıa» aksıasy aıasynda 3 125 lıtr boıaý taratyldy.
«Úzdik komýnaldyq qyzmetker» baıqaýynyń qorytyndysy boıynsha ár aýdannan 24 adam marapattaldy. Jeńimpazdarǵa mynadaı aqshalaı syılyqtar berildi: I oryn – 150 000 teńge, II oryn – 100 000 teńge, III oryn – 50 000 teńge.