Keshte kompozıtordyń 20-ǵa jýyq án, romans jáne hor shyǵarmasy oryndaldy
Hasanǵalıevtiń shyǵarmashylyǵyna arnalǵan «Asyl arman» atty eske alý keshi ótti. Keshtiń basty ereksheligi - dańqty kompozıtordyń 20-ǵa jýyq án, romans jáne hor shyǵarmasyn teatrdyń ártisteri oryndap shyqty, dep habarlaıdy Almaty-akshamy.kz Almaty.tv -ge silteme jasap.
«Eskirmegen mahabbat» dep el esinde eńseli beınesi saqtalǵan daryndy tulǵany eske alýǵa kelgen eldiń qarasy qalyń boldy. Atamekenin ánine qosyp, mańdaıynan esken samaldy halqynyń alaqany dep bilgen birtýar sazgerdiń árbir ánin jurt emirene tyńdap otyrdy.
«Eskendir aǵamyzdyń týyndysynyń ereksheligi – kez kelgen ánin klasıkalyq úlgimen oryndaı berýge bolady. «Eskendir aǵamyzdyń áni tek estradaǵa arnalǵan» dep oılaýy múmkin. Negizinde olaı emes. Qazaq barda Eskendir aǵamyzdyń aty óshpeıtinine men kámil senemin», – dedi Abaı atyndaǵy Qazaq ulttyq opera jáne balet teatrynyń dırektory Nurbaqyt Bókebaev.
Keshte XX ǵasyrdyń sońynda ónerge lırıkalyq lep bergen esti ánder de oryndaldy. Asqan jaýapkershilikti talap etetin kúrdeli shyǵarmalardy uıymdastyrýshylar biraz ýaqyttan beri shyńdaǵan eken. Ondaǵy maqsat – sazgerdiń týyndylaryn óskeleń urpaqqa sińirý.
«Konservatorıada, Astanadaǵy mýzykalyq akademıada emtıhanda, akadamıalyq konsertte Eskendir aǵamyzdyń romanstaryn qosyp júr. Memlekettik ekzamende de Eskendir aǵamyzdyń ánderi oryndalyp júr», – dedi Abaı atyndaǵy qazaq ulttyq opera jáne balet teatrynyń ánshisi Bolat Bókenov.
«Keshti Abaı atyndaǵy Qazaq ulttyq opera jáne balet teatry uıymdastyryp otyr. Eskendir Hasanǵalıevtiń buryn estilmegen án, romanstary oryndaldy. «Atameken» ánimen aıaqtalady eken, sol fınalda operalyq ánshilerdi súıemeldep, roıálda oryndaıtyn bolamyn», – dedi E. Hasanǵalıevtyń uly, QR Eńbek sińirgen qaıratkeri Birjan Hasanǵalıev.
Ultynyń janyn terbetip, sezimin oıatqan ataqty kompozıtor qazaq, orys, tatar, nemis aqyndarynyń óleńine kóptegen án jazǵany belgili. Osyndaı er esimi jyl ótken saıyn el esinde jattalyp, máńgilik ómir súreri shúbásiz.