Zańsyz aınalymnan 120 keliden astam esirtki zattary tárkilendi.
Jyl basynan beri 4 esirtki zerthanasy joıyldy, dep habarlaıdy Almaty-akshamy.kz
Almaty polısıasy jyl basynan beri 283 esirtki qylmysyn anyqtady. Esirtki qylmysyna qarsy kúres basqarmasy jumysyndaǵy basym baǵyt – sıntetıkalyq esirtkilerdi anyqtaý jáne olardy óndirý boıynsha zerthanalardyń qyzmetin toqtatý.
72 tonna prekýrsorlar, esirtki óndirýge paıdalanylǵan basqa da zattar men qural-jabdyqtar tárkilenip, 8 tonna paıdalanýǵa daıyn zattardyń aınalymy toqtatyldy. Sıntetıkalyq esirtkilerdi betbelgiler arqyly taratý úrdisi ózekti máselelerdiń biri bolyp otyr. Jyl basynan beri 30 esirtki betbelgisin qoıýshylar anyqtaldy.
"Biz halyqpen birigip, betbelgi qoıýshylardyń sanyn barynsha azaıta alamyz. Qalalyq PD-nyń senim telefony (Whatsapp 87055497025) táýlik boıy jumys isteıdi, oǵan esirtki qylmysy derekteri, jıi qoldanylatyn betbelgilerdiń oryndary, betbelgi qoıýshylar men tutynýshylar keletin kólikterdiń nómirleri, graffıtı sýretteriniń ornalasqan jeri, esirtki qoımalarynyń mekenjaılary týraly habarlaýǵa bolady", – dedi Almaty qalalyq polısıa departamenti bastyǵynyń orynbasary Dıdar Ahanov.
Búgingi kúni 3000-ǵa jýyq graffıtı-sýretteri anyqtalyp, ústinen boıaý arqyly joıyldy. Esirtkini taratýmen jáne jarnamalaýmen aınalysatyn 238 ınternet-saıt anyqtaldy jáne buǵattaldy.
Polısıada esirtki qylmysynyń aldyn alý jáne onymen kúresý maqsatynda "Haqnazar" qoǵamdyq qorymen birlesip, Almaty qalasy ákimdiginiń jastar saıasaty máseleleri basqarmasynyń qoldaýymen "Narkostop" jobasy qolǵa alynǵanyn aıtyp ótti.