Almaty polısıasy esirtki tıelgen eki kólikti toqtatty.
Birinshi jaǵdaıda esirtki qylmysyna kúdiktiniń kóligin polısıa qyzmetkerleri "Aqsaı" yqshamaýdanynda tańǵy jetide toqtatty, dep habarlaıdy Almaty-akshamy.kz Polisia.kz-ke silteme jasap.
«Bul – D. esimdi azamat basqarǵan Daewoo Nexia kóligi. Jolaýshy 27 jastaǵy er adam. Kólikti tekserý barysynda qara jáne kók tústi ızolentamen oralǵan 39 polıetılen baılamy tabyldy jáne tárkilendi, onyń ishinde ózine tán ıisi bar aq tústi untaq tárizdi zat boldy. Sot-hımıalyq saraptamanyń qorytyndysyna sáıkes, tárkilengen zattar sıntetıkalyq mefedron esirtkisi ekeni anyqtaldy. Jastar esirtki qoıýshy retinde qosymsha tabys tabatynyn, tapsyrys tanymal messendjer arqyly qabyldanatynyn moıyndady. Ustalǵandardyń is-áreketteri tergeýmen QR QK-niń 297-baby 3-bóliginiń 5-tarmaǵy boıynsha saralanady. Olar tutqyndaldy. Bul esirtki qylmysy úshin 10 jyldan 15 jylǵa deıin bas bostandyǵynan aıyrý qarastyrylǵan», – dedi Almaty qalalyq PD Esirtki qylmysyna qarsy kúres basqarmasynyń bastyǵy Erlan Álmaǵambetov.
Medeý aýdanynda Ospanov kóshesiniń boıynda polısıanyń arnaıy jasaǵy taǵy bir kúdikti kólikti toqtatty. Toyota Camry kóligin 32 jastaǵy K. esimdi azamat basqaryp kele jatqan.
«Kólikti tekserý barysynda qara ızolentamen oralǵan 4 polıetılen baılamy tabyldy jáne tárkilendi, onyń ishinde ózine tán ıisi bar aq tústi untaq tárizdi zat boldy. Sot-hımıalyq saraptamanyń qorytyndysyna sáıkes, tárkilengen zattar asa iri salmaqtaǵy sıntetıkalyq mefedron esirtki zaty bolyp shyqty. Er adamnyń esirtkini qandaı maqsatta saqtaǵanyn jáne tasymaldaǵanyn tergeý anyqtaıtyn bolady. Bálkim, ol shópti satyp, odan aqsha tapqan bolýy da múmkin», – dedi E. Álmaǵambetov.