Almatyda ál-Farabı dańǵylynan Rysqulov dańǵylyna deıingi Esentaı ózeni boıyndaǵy aýmaqty kóriktendirý, onyń ishinde jaǵalaýdy kórkeıtý boıynsha jobalyq-smetalyq qujattama (JSQ) ázirlenip jatyr. Qujat 2025 jyly shildede memlekettik saraptamadan ótpek.
Joba boıynsha 43,2 gektar aýmaq kórkeıtiledi, qazirdiń ózinde jalpy uzyndyǵy 7,22 shaqyrymdyq aımaq kóriktendirilgen. Jobanyń maqsaty - zamanaýı, yńǵaıly ári úılesimdi demalys aımaǵyn qurý ári sýǵa shomylyp, jaǵalaý boıymen erkin tynystaý. Túrlengen jaǵalaý turǵyndar men qonaqtar úshin tabıǵı jáne qalalyq landshafttyń bir bóligine ári tartymdy demalys ornyna aınalady.
Jobanyń negizgi erekshelikteriniń biri - fýnksıonaldy aımaqtarǵa bólý. Iaǵnı, ózen boıymen jeti biregeı keńistikti qurý josparlanǵan, olardyń árqaısysynyń ózindik tujyrymdamasy bolady:
* ál-Farabı dańǵylynan Tımırázev kóshesine deıingi jastar aımaǵy.
* Tımırázev kóshesinen Buqar jyraý býlvaryna deıin stýdenttik aımaq
* Buqar Jyraý býlvarynan Abaı kóshesine deıin belsendi aımaq.
* Abaı kóshesinen Qurmanǵazy kóshesine deıin mádenı aımaq.
* Qurmanǵazy kóshesinen Jambyl kóshesine deıin tartymdy demalys aımaǵy.
* Jambyl kóshesinen Qarasaı batyr kóshesine deıin taǵy da jastar aımaǵy.
* Qarasaı batyr kóshesinen Rysqulov dańǵylyna deıingi tartymdy demalys aımaǵy.
Joba aıasynda belsendi demalys oryndary men sporttyq is-sharalardan bastap, erkin serýendeıtin, kezdesýler men mádenı is-sharalar ótkizetin túrli qoǵamdyq keńistikter qurý josparlanyp otyr.
Jobanyń oryndalý barysy aldaǵy ýaqytta taǵy da habarlanady.