İs-shara aıasynda Alǵys hattar men medaldar tabystaldy.
Almatyda 20 tamyzda Sport kúnin merekeleý qurmetine eńbek sińirgen sportshylardy, ataqty qaıratkerler men sport ardagerlerin saltanatty marapattaý rásimi ótti, dep habarlaıdy Almaty-akshamy.kz
Marapattaý rásimi respýblıkalyq jáne halyqaralyq jarystarda qalanyń sporttyq bedelin kóterýge yqpal etken kóptegen sportshylardy, jattyqtyrýshylardy, sport uıymdarynyń birinshi tulǵalaryn, sondaı-aq sport ardagerlerin jınady.
Almaty qalasy ákiminiń orynbasary Álisher Ábdiqadyrov qatysýshylar men jeńimpazdarǵa shyn júrekten alǵys bildirip, olardyń sportqa degen adaldyǵyn jáne salaýatty ómir saltyn nasıhattaýdaǵy erekshe rólin atap ótti.
Kásibı sporttaǵy sińirgen eńbegi jáne salaýatty ómir saltyn nasıhattaǵany úshin mynalar marapattaldy: Chendýde sporttyq gımnastıkadan ótken jazǵy Ýnıversıadanyń chempıondary Mılad Karımı jáne Narıman Qurbanov, bokstan álem chempıondary Nazym Qyzaıbaı jáne Alýa Balqybekova, erkin kúresten Álem chempıonatynyń kúmis júldegeri Aıtmuhan Rızabek, «Sen basqasyń» jobasynyń negizin qalaýshy Valıhan Ten, «Birinshi bolý batyldyq» korporatıvti qorynyń atqarýshy dırektorry Saltanat Qazybaeva, «Shymbulaq» taý shańǵysy kýrortynyń dırektory Rınat Ábdirahmanov, erkin kúresten birneshe dúrkin Olımpıada chempıony Islam Baıramýkov, jeńil atletıkadan QR eńbek sińirgen jattyqtyrýshysy Ámın Tuıaqov,, sondaı-aq sport federasıalarynyń, olımpıadalyq rezervtegi balalar men jasóspirimder mektepteriniń basshylary jáne QR eńbek sińirgen jattyqtyrýshylary.
«Almaty Qazaqstannyń barlyq óńirleri arasynda jazǵy jáne qysqy sport túrleri boıynsha eńbegi sińgen kóshbasshy bolyp tabylady. Ulttyq quramanyń myńǵa jýyq sportshysy-qalamyzdyń túlekteri. Biz talantty sportshylardyń tutas bir tobyn ósirgen qalamyzdyń baı sporttyq tarıhymen maqtanamyz jáne álemdik arenada elimizdiń namysyn qorǵaǵan uly chempıondardy eske alamyz», - dep quttyqtady marapattaý rásimine qatysýshylardy Álisher Ábdiqadyrov.