Kardıologıa jáne ishki aýrýlar ǵylymı-zertteý ınstıtýtynda elimizdiń ońtústik óńirinde alǵash ret Farapulse Ablation eń sońǵy tehnologıasy boıynsha júrekke biregeı ota jasaldy.
Bul oqıǵa arıtmıany emdeýde jańa dáýirdi ashady jáne Almatynyń ınovasıalyq medısınadaǵy kóshbasshy retindegi ustanymyn nyǵaıtyp, eldegi joǵary tehnologıalyq medısınany damytýdaǵy mańyzdy qadam bolmaq jáne Qazaqstannyń emdeýdiń eń zamanaýı jáne qaýipsiz ádisterin engizýge daıyndyǵyn dáleldeıdi.
Operasıalardy Zagreb ýnıversıtettik klınıkasynyń (Horvatıa) jetekshi mamany Vedran Velagıchtiń qatysýymen ınstıtýttyń ıntervensıalyq arıtmologtary jasady.
"Almatyda Farapulse Ablation kómegimen operasıa jasaý úlken jetistik. Bul bizdiń dárigerlerge álemdik ozyq jetistikterdi paıdalanýǵa, emdeý sapasyn arttyrýǵa jáne arıtmıadan zardap shegetin naýqastarǵa úmit syılaýǵa múmkindik beredi", - deıdi basqarma tóraǵasy Rústem Tóleýtaev.
Arıtmologıalyq qyzmettiń aǵa ordınatory Asylhan Parımbekovtyń aıtýynsha, Farapulse Ablation - júrek yrǵaǵynyń jıi kezdesetin buzylystarynyń biri bolyp tabylatyn júreksheler fıbrıllásıasyn emdeýdiń revolúsıalyq ádisi. Radıojıilikti nemese krıoablásıany qoldanatyn dástúrli ádisterden aıyrmashylyǵy, Farapulse tehnologıasy qysqa, joǵary energıaly elektr órisiniń ımpúlstaryn paıdalanady.
"Bul ımpúlstar naqty dáldikpen áreket etip, arıtmıany týdyratyn aýrý júrek jasýshalaryn ǵana joıady. Qorshaǵan tinder, sonyń ishinde nervter men óńesh zaqymdanbaıdy. Bul tásil prosedýrany qaýipsiz, jyldam jáne tıimdirek etedi, operasıa ýaqytyn qysqartady jáne naýqastardyń saýyǵýyn tezdetedi", - deıdi dáriger.
Júrekshelerdiń fıbrıllásıasy - júrekshelerdiń jyldam jáne turaqty emes jıyrylýymen kórinetin eń kóp taralǵan aýrýlardyń biri. Onyń eń qaýipti saldary - ınsýltke ákeletin qan uıyǵyshtarynyń paıda bolýy. Aýrýdyń jıiligi jas ulǵaıǵan saıyn artady – keıbir málimetter boıynsha 50 jasta 1%-ǵa deıin, 65 jasta 6%-ǵa deıin, 80 jasta 6-15%-ǵa deıin. Bul ınsýlt qaýpin 4 esege, kenetten qaıtys bolý qaýpin 2 esege deıin arttyrady.
Alǵashqy naýqastardyń biri 56 jastaǵy áıel júrekshelerdiń paroksızmaldy fıbrıllásıasy, tahı-bradı nusqasy, aýyr asqyný qaýpi óte joǵary aýyr gıpertenzıadan zardap shekken. Klınıkaǵa túsken kezde jalpy álsizdik, fızıkalyq júkteme kezindegi (2-qabatqa kóterilgende) entigý, 2-3 saǵatqa deıin sozylatyn jyldam yrǵaqty júrek soǵý ustamalary mazalaǵan.
Taǵy bir naýqas, 68 jasta, júrekshelerdiń paroksızmaldy fıbrıllásıasy, tahıstolıkalyq nusqa, júrektiń ıshemıalyq aýrýy, stenokardıa, 2022 jyly mıokard ınfarktine shaldyqqan, arterıalyq gıpertenzıa, shyǵarylym fraksıasy 34%-ǵa tómendegen júrektiń sozylmaly jetkiliksizdigi bolǵan. Sońǵy 3 jylda oǵan stent qoıylǵan, mammaro jáne aortakoronarlyq shýnttaý jasalǵan, kardıoverter defıbrıllátory ımplantasıalanǵan. Onyń da osyndaı shaǵymdary bolǵan.
2 kún ishinde 10 operasıa jasaý josparlanýda. Otalar MÁMS aıasynda tegin jasalady.