Almaty kóshelerinde jeke mobıldi kólikter, onyń ishinde elektrosamokattardyń turaqtary úshin arnaıy jol belgileri jasalýda. Atalǵan shara qala ákimdigi men kıksherıngtik servısterdiń arasynda jasalǵan qoldanystaǵy memorandým aıasynda júzege asýda, dep habarlaıdy Almaty-akshamy.kz.
Birinshi kezeńde belgiler Dostyq, Abaı, Nazarbaev dańǵyldary, Gogol kóshesiniń boıyna jasalýda. Keıin qalanyń júktemesi meıilinshe joǵary bólikterin qamtý josparlanýda. Jyl sońyna deıin qala boıynsha 500 turaq jasalatyn bolady.
Turaq aýmaqtary aq tústi boıaýmen samokat keskini arqyly belgilenedi. Turaq alańy shamamen 4 sharshy metrdi quraıdy, oǵan 10-ǵa jýyq jaldamaly samokat qoıýǵa bolady. Arnaıy belgilerdiń jasalýy qala turǵyndaryna jaldamaly samokattardy jaıaý júrginshiler men kólikterge kedergi keltirmeıtin oryndarǵa qaldyrýǵa múmkindik beredi.
Eske salsaq, qala ákimdigi men samokattardy jalǵa berý qyzmetin usynatyn servıster operatorlary arasynda ózara túsinistik pen seriktestik týraly memorandýmǵa qol qoıylǵan bolatyn. Qujat jeke qozǵalys quraldaryn paıdalaný kezindegi qaýipsizdikti qamtamasyz etip, apatty jaǵdaılardyń aldyn alýǵa baǵyttalǵan. Qazirgi kezde Almatyda 15 myńǵa jýyq elektrosamokattar jalǵa beriledi jáne kúnine 100 myńǵa jýyq qozǵalys jasaýǵa bolady.