Kúdiktiniń jeke basy birden anyqtaldy.
Almaty polısıasy urlanǵan altynnyń jasyrylǵan ornyn tapty, dep habarlaıdy Almaty-akshamy.kz Polisia.kz-ke silteme jasap.
Jetisý aýdandyq polısıa basqarmasynyń málimetinshe, 12 tamyzǵa qaraǵan túni qaladaǵy bazarlardyń birinde altyn-kúmis áshekeı buıymdarynyń iri urlyǵy jasalǵan.
«QR QK-niń 188-baby 4-bóligi (Urlyq) boıynsha tergelip jatqan qylmystyq is materıaldaryna sáıkes, qaskóı bazardyń altyn satatyn qataryna túnde kirip ketken. Ol segiz saýda ornynyń sórelerin syndyryp, ózimen birge 100 mln teńgeniń áshekeı buıymdaryn alyp ketken. Bul qylmysty ashý maqsatynda tergeý-jedel toby quryldy. Bazardaǵy beınebaqylaý júıelerine taldaý jasaldy. Kúdiktiniń jeke basy birden anyqtaldy. Bul – 35 jastaǵy A. esimdi azamat. Ol Qonaev qalasyndaǵy qonaqúılerdiń birinde ustaldy. Kúdikti sol jerde ýaqytty ótkizýdi josparlaǵan kórinedi», – dedi Jetisý aýdandyq polısıa basqarmasynyń bastyǵy Darhan Musanov.
Qaskóıdiń urlaǵan múlikti jasyrǵan jeri anyqtaldy. Ol urlanǵan altyndardy qala shetindegi shól dalaǵa jasyrǵan. Zattaı aıǵaqtar tárkilendi. QR QPK-niń 128-babyna (Ustap alý negizderi) sáıkes A. esimdi azamat ýaqytsha ustaý ızolátoryna qamaldy. Bultartpaý sharasy retinde sot qamaýǵa alýdy sanksıalady.
