Orta eseppen 300 teńgege artady
Almatyda elektr qýatynyń tarıfy kóteriledi. Bul Qazaqstanda elektr energıasyna tarıfterdi saralaýdy joıý boıynsha ótken dóńgelek ústel barysynda belgili boldy, dep habarlaıdy Almaty-akshamy.kz QazAqparatqa silteme jasap.
Básekelestikti qorǵaý jáne damytý agenttiginiń Otyn-energetıka ónerkásibi departamenti dırektorynyń mindetin atqarýshy Qýat Asambekovtyń sózinshe, pılottyq joba aıasynda Almaty turǵyndaryna elektr energıasy úshin túbirtekterdegi aı saıynǵy tólem quny tutynylatyn energıa kólemine baılanysty orta eseppen 300 teńgege artady.
«Halyqtyń áleýmettik muqtaj toptary úshin tarıf ózgermeıdi, aıyrmany olarǵa ataýly turǵyn úı kómegi esebinen memleket sýbsıdıalaıtyn bolady. Qazaqstannyń qalǵan óńirlerinde elektr energıasyna tarıfterdi saralaýdy joıý 2023 jyldan bastalady»,- dedi ol.
Spıker turmystyq tutynýshylar úshin tarıfter zańdy jáne búdjettik tutynýshylar úshin jasandy ósimge baılanysty tómendeý baǵytynda saralanǵanyn túsindirdi.
«Tutynýshylar arasyndaǵy tarıfterdiń saralanýyn tómendetý shamamen 10%-dy quraıdy. Iaǵnı, turmystyq tutynýshylar sanatyna 10 paıyzǵa ósim bolady. Biraq bul jerde másele qymbattatýda emes. Ortasha tarıf mólsherlemesi óspeıdi. Munda másele aıyrmashylyqty azaıtý týraly bolyp otyr. Saıyp kelgende, barlyǵy birdeı tarıf tóleýi kerek», - dedi Qýat Asambekov.
Ol jobanyń birinshi kezeń aıasynda jeke jáne zańdy tulǵalardyń tarıfteri arasyndaǵy aıyrmashylyq shamamen 30 paıyzǵa tómendeıtinin atap ótti.
Buǵan deıin Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov Qazaqstanda elektr energıasy tarıfterin saralaýdy joıý boıynsha ázirlengen pılottyq jobanyń artyqshylyǵy týraly aıtqan bolatyn.