Almatyda kógaldandyrý jáne ekologıalyq jobalarǵa 2025 jyly aldyn ala aqparat boıynsha 10,6 mlrd teńge bólý josparlanýda
2025 jyly Almatyda ekologıalyq jobalarǵa 10,6 mlrd.teńge bólý josparlanýda, bul qala turǵyndarynyń ómir súrý sapasyn jaqsartýǵa jáne jaıly qalalyq ortany damytýǵa baǵyttalǵan. 2025-2027 jyldarǵa arnalǵan búdjettiń tıisti jobasyn Almaty Máslıhatynyń aldaǵy sesıasynda qaraý josparlanýda. Bul týraly qalalyq Máslıhattyń baspasóz qyzmeti habarlady.
Negizgi baǵyttardyń qatarynda qalany kógaldandyrý, qatty turmystyq qaldyqtardy jınaý úshin ınfraqurylymdy jaqsartý jáne tabıǵı obektilerdi abattandyrý bar.
Qalany kógaldandyrý jobasy aǵashtar men butalardy otyrǵyzýdy jalǵastyrýdy, sondaı-aq saıabaqtar men jasyl aımaqtardy abattandyrýdy qamtıdy. Aǵymdaǵy jyly Almatyda búdjet qarajaty esebinen 170 myń kóshet otyrǵyzý josparlanýda, onyń ishinde kúzgi otyrǵyzý maýsymynyń basynan bastap 110 myńnan astamy otyrǵyzyldy, bul bir qala turǵynyna jasyl ekpelerdiń aýdanyn 12,5-ten 12,8 sharshy metrge deıin ulǵaıtýǵa kómektesedi.
Sonymen qatar, 2025 jyly qatty turmystyq qaldyqtardy jınaý júıesin jańartý jalǵasady. Qalada tereńdetilgen úlgidegi 2 myńnan astam konteınerlik alań salynady, bul qalanyń sanıtarlyq jaǵdaıyn jaqsartady. Budan basqa, İle aýdanynda QTQ kómýge arnalǵan jańa polıgonnyń jobasy ázirlenýde, bul bolashaqta qaldyqtardy kádege jaratý máselelerin tıimdi sheshýge kómektesedi.
Úlken Almaty jáne Qarǵaly sıaqty ózen arnalaryn qaıta qurý, sondaı-aq «Saıran» sý qoımasyn abattandyrý jobalary tabıǵı ekojúıelerdi qalpyna keltirýge jáne qala turǵyndarynyń demalýy úshin jańa ekologıalyq taza aımaqtardy qurýǵa baǵyttalǵan.