Esirtkiniń zańsyz aınalamyna qatysty 601 quqyq buzýshylyq anyqtaldy
Almatyda esirtki satýshylar 10 jáne 11 jylǵa bas bostandyǵynan aıyryldy, dep habarlaıdy Almaty-akshamy.kz Polisia.kz-ke silteme jasap.
Esirtki qylmysy Almatynyń irgesindegi saıajaıda, jaldamaly úıde esirtki zerthanasyn uıymdastyrǵan eki jigitke qatysty bolyp otyr. Olardy áshkereleý boıynsha arnaıy is-shara kezinde ǵımaratty tintý barysynda hımıalyq reagentter, sıntetıkalyq preparattardy jasaýǵa arnalǵan ártúrli komponentter, sondaı-aq satýǵa daıyn jalpy salmaǵy 3,5 keli bolatyn metkatınon (mefedron) zaty tárkilendi. Bul ónimniń satylymdaǵy baǵasy 40 mln teńgeni quraıtyn edi. Almaty qalalyq sotynyń úkimimen olar 10 jáne 11 jylǵa bas bostandyǵynan aıyryldy.
«Esirtki qylmysy – ult densaýlyǵyna úlken qaýip. Burynnan belgili esirtkilermen qatar, jańa sıntetıkalyq túrleri kún saıyn derlik paıda bolady, olar arzanyraq jáne satyp alýǵa yńǵaıly. Bizdiń bólimshe qyzmetindegi basym baǵyt – sıntetıkalyq preparattardy anyqtaý jáne olardy óndirý boıynsha zerthananyń qyzmetin toqtatý. Almatyda júrgizilgen is-sharalardyń nátıjesinde úsh zerthana joıyldy, esirtki zattaryn jarnamalaýdyń alty faktisi anyqtaldy. Qylmystyń bul túri, ádette, bir adammen emes, toppen jasalady, olardyń árqaısysynyń jaýapkershiligi naqty belgilengen. Osylaısha, biz qylmystyń uıymdasqan túrimen kúresip jatyrmyz. Jasyryn oryndarda (betbelgilerde), ınternet arqyly elektrondy tólemderdi paıdalana otyryp, sıntetıkalyq esirtkini kontaktisiz ádispen taratý úrdisi – ózekti máselelerdiń biri. Biz 443 ınternet-saıtty buǵattaý úshin İİM-ne aqparat jiberdik», – dedi Almaty qalalyq PD Esirtki qylmysyna qarsy kúres basqarmasynyń bastyǵy Erlan Álmaǵambetov.
Anyqtama úshin: jyl basynan beri qalada esirtkiniń zańsyz aınalymyna qatysty 601 quqyq buzýshylyq anyqtaldy. 372 keliden astam esirtki zattary tárkilenip, zańsyz aınalymǵa jiberilgen joq.