«Qara altyndy» basqarýda jańashyl kózqaras, tyń ıdeıalar kerek
Almatydaǵy Qazaqstan-Brıtan tehnıkalyq ýnıversıtetinde Dúnıejúzilik munaı keńesiniń VII jastar forýmyna 29 elden 700-ten asa delegat qatysty, dep habarlaıdy «Habar 24».
Jıyn nátıjesinde Almaty deklarasıasy qabyldandy. Sonymen qatar forýmda Qazaqstan-Brıtan tehnıkalyq ýnıversıteti álemdegi tehnıkalyq ýnıversıtetter úshin bilim berý habyna aınalady degen sheshim qabyldandy. Bolashaqta munaı-gaz óndirisinde joǵary tehnologıalardyń mańyzdylyǵy búgingiden de kúsheıe túsedi. Bul – İT mamandarǵa suranys artady degen sóz. Sondyqtan jastar sıfrlyq tehnologıalardy jetik meńgergeni abzal. Dúnıejúzilik munaı keńesiniń jastar forýmy da osy ózekti máseleni qaýzady. Jıynǵa qatysqan stýdentter men jas mamandar munaı-gaz salasynyń kóshbasshylarymen, sarapshylarymen pikir almasyp, oı bólisti.
«Bul konferensıanyń basty baǵyty – jastarǵa kóńil bólý. Óıtkeni munaı-gaz salasynda jas mamandardyń alatyn orny erekshe. Munaı salasynyń bolashaǵy úshin jastardyń biliktiligi óte mańyzdy. «Qara altyndy» basqarýda jańashyl kózqaras, tyń ıdeıalar kerek», - deıdi DMK Kanada ulttyq komıtetiniń vıse-tóraǵasy Dın Taker.
Forýmǵa qatysýshylar munaı-gaz salasyndaǵy strategıalyq máselelerdi sheshýdegi tájirıbelerimen bólisti. Eń ozyq jetistikterdi taldap, energetıka salasyndaǵy ózgeristerdi jedeldetý úshin tyń tásilder izdeý qajettiligine basymdyq berdi. Jıyn sońynda Dúnıejúzilik munaı keńesiniń jańa strategıasy qabyldandy.
«Dúnıejúzilik munaı keńesiniń strategıasy sońǵy 40 jylda ózgergen joq. Al búgin kópjyldyq qujat qaıta qaralyp, Almaty deklarasıasy qabyldandy. Jańa qujat – yntymaqtastyqty damytýǵa, jańa deńgeıdegi mamandar daıarlaýǵa, aqparat almasýǵa, dostyq qarym-qatynasty nyǵaıtýǵa múmkindik beredi», - deıdi QBTÝ rektory Maratbek Gabdýllın.
Dúnıejúzilik munaı keńesi – munaı-gaz salasyndaǵy negizgi máselelerdi talqylaýǵa arnalǵan halyqaralyq forým. Ol 1933 jyly Londonda qurylǵan. Keńeske álemniń 70 eli kiredi.