Almatyda Dinmuhamed Ahmetuly Qonaevqa tıesili bolǵan ZIL-114 lımýzıni qaıta qalpyna keltirildi.
Keńestik Qazaqstannyń basshysy bul kólikti 1976-1978 jyldary mingen. 90-jyldary garajda turǵan eskiniń kózi biraz ýaqyttan soń jekeniń qolyna ótedi. Al, byltyr mashına Qonaev atyndaǵy halyqaralyq qorǵa qaıtaryldy. Qalpyna keltirilgen sırek kezdesetin kólik alǵash ret jýrnalıserge kórsetildi, dep habarlaıdy Almaty-akshamy.kz 24.kz-ke silteme jasap.
Bastapqy qalpyna keltirilgen lımýzınge qarap, zaýyttan shyqqanyna 50 jyl bolǵan degenge sený qıyn. Jeke kompanıanyń qarajatymen qaıta jańarǵan kóliktiń qozǵaltqyshy, tipti radıosy da túpnusqa qalpynda saqtalǵan. Tarıhı jádiger sonysymen baǵaly. KSRO Saıası búrosynyń músheligine saılanǵan Qonaevqa qyzmettik mártebesine sáıkes joǵary dárejeli kólik tıesili edi. Sondyqtan 1976 jyly ZIL-114 lımýzıni Dımash Ahmetulyna qyzmettik kólik retinde beriledi.
Bolat Qajyákbar Baıbol, D.Qonaev atyndaǵy halyqaralyq qordyń vıse-prezıdenti:
- Brejnev Leonıd Ilıch birde: «Dımash Ahmetuly sizge kólik berildi me?», dep suraıdy. Dımash Ahmetuly: «Joq, ázirge almadym», - deıdi. «Onda meniń kóligimdi alyńyz», - deıdi Brejnev. Bylaısha aıtqanda, bul kólikti Leonıd Ilıch Dımash Ahmetulyna syıǵa beredi.
ZIL-114 kóligi kezinde Keńes Odaǵynyń avtomobıl ónerkásibiniń eń joǵary jetistigi boldy. 1967-1978 jyl aralyǵynda bar bolǵany 103 danasy shyqty. Salmaǵy 3 tonnadan astam, uzyndyǵy – 6 metr. Lımýzın segiz sılındrli 7 lıtrlik qozǵaltqyshpen jabdyqtalǵan. Iaǵnı, qýaty 300 attyń kúshine teń. Qonaevtyń jeke júrgizýshisi, sol kezdegi Memlekettik qaýipsizdik komıtetiniń qyzmetkeri 25 jastaǵy Sergeı Korneev edi. Araǵa kóp jyldar salyp, Sergeı Mıhaılovıch búgin alǵash ret jańartylǵan kóliktiń tizginine qaıta otyrdy. Korneev Dımash Ahmetulyn kólikpen jumysqa aparǵan kezin eske aldy.
Sergeı Korneev, D.Qonaevtyń jeke júrgizýshisi:
- Shynymdy aıtsam, sol kezde arqamnan sýyq ter shyqty. Qalaıda qatelespeýdi oıladym. Birinshiden, meniń artymda memleket basshysy otyr, ekinshiden, qatty tolqyp turǵanym bar. Degenmen, dittegen jerimizge jettik. Dımash Ahmetuly meniń jaıymdy sezip otyrypty, kólikten túskende «Sereke, qobaljyma, sabyrly bol. Men eshqandaı eskertý jasamaımyn. Kólik júrgizý kezinde júrgizýshige eskertý jasaýdyń qandaı bolatynyn bilemin», dedi.
Lımýzındi Qonaev eki jyl mingen. 1978 jyly oǵan ZIL-115 kóligi berildi. Eski kólik uzaq jyldar memlekettik garajda saqtalyp, keıin Jambyl oblysynyń basshylyǵyna beriledi. Odan keıin tarazdyq kásipkerler ony 20 myń dollarǵa satyp alady. Olar kólikti 1996 jyly D.Qonaev qoryna tapsyrǵanymen, 2003 jyly ol qaıtadan jekeniń qolyna ótip ketken. Kóneniń kózi aqyry ótken jyly ǵana qorǵa qaıtaryldy. Qor basshylyǵy aldaǵy ýaqytta ZIL-114 avtokóligin «Qonaev ortalyǵy» tarıhı keshenine syıǵa tartpaq. Aıta keteıik, bul nysan Qonaev qalasynda salynady. Erekshe kólik tarıhı keshenniń eń basty jádigeri bolatyny sózsiz.