Almatyda depýtattyq korpýs 66,7% jańartyldy

Almaty qalasy máslıhatynyń jańa depýtattyq korpýsy jumysqa kiristi.

Aralas saılaý júıesi boıynsha saılanǵan 42 depýtat VIII shaqyrylymdaǵy qalalyq máslıhattyń birinshi sesıasy barysynda turaqty komısıalar boıynsha bólindi, dep habarlaıdy Almaty-akshamy.kz Egemen.kz-ke silteme jasap. 

Aıta ketý kerek, 2004 jyldan beri alǵash ret depýtattardyń 50%-y partıalyq tizimder boıynsha, qalǵan 50%-y majorıtarlyq júıe boıynsha saılandy.

Sesıa jumysyn asha otyryp, Almaty qalasy boıynsha aýmaqtyq saılaý komısıasynyń tóraǵasy Aıgúl Qalyqova VIII shaqyrylymdaǵy Almaty qalasy máslıhaty depýtattarynyń kýálikteri men tósbelgilerin tapsyrý rásimin ótkizdi.

Birinshi sesıa barysynda máslıhat tóraǵasy jáne jańadan qurylǵan turaqty komısıalardyń tóraǵalary saılandy. Osylaısha, «AMANAT» partıasy fraksıasynyń usynysy negizinde VIII shaqyrylymdaǵy Almaty máslıhatynyń tóraǵasy bolyp Meıirjan Otynshıev saılandy.

Sonymen qatar saılaý komısıasy «Qazaqstandaǵy jergilikti memlekettik basqarý jáne ózin-ózi basqarý týraly» zańyna sáıkes «AMANAT» partıasynyń fraksıasy tirkelip, onyń basshysy bolyp Stanıslav Kankýrov saılanǵany týraly habarlama jasady.

Sondaı-aq daýys berý nátıjesinde turaqty komısıalardyń basshylary anyqtaldy:

1. Ekonomıka, qarjy, aktıvter, memlekettik basqarýdy damytý jáne qoǵamdyq qaýipsizdik jónindegi komısıa, tóraǵasy – Nábıev Ámirjan Ámirjanuly.


2. Qurylys, sáýlet, ýrbanıstıka jáne jer qatynastary jónindegi komısıa, tóraǵasy – Shoqanov Nursultan Nurlanuly.


3. Komýnaldyq ınfraqurylym, energetıka, sýmen jabdyqtaý jáne qalalyq mobıldilik jónindegi komısıa, tóraıymy – Ómirbaeva Zaýresh Ábilǵojaqyzy.


4. Kásipkerlik, ınvestısıalar, týrızm jáne ekologıa jónindegi komısıa, tóraǵasy – Idrısov Rýslan Rashıtovıch.


5. Qoǵamdyq damý, mádenıet, sport, din jáne jastar jónindegi komısıa, tóraıymy – Aqanova Ásıa Aıqanqyzy.


6. Densaýlyq saqtaý, bilim jáne jumyspen qamtý jónindegi komısıa, tóraǵasy - Qodasbaev Almat Turysbekuly.

Bir mandatty okrýgterdi eskere otyryp, 24 mandatpen «AMANAT» partıasy basymdyqqa ıe boldy. «Respublica» partıasynda 5 mandat, «Qazaqstan Halyq partıasy» men «BAYTAQ» partıalarynda úsh mandattan bar. «Aq Jol» partıasy 2 mandatty alsa, partıalyq emes depýtattar 5 mandatqa ıe boldy.

Máslıhat depýtattarynyń quramyn jańartý 66,7% qurady. Áıelder, jastar jáne múmkindigi shekteýli jandar sany 38,1% qurady. Ulttyq quramy boıynsha: qazaqtar – 78,6%, orystar – 7,1%, kárister – 4,8%, uıǵyrlar – 4,8%, tatarlar – 2,4%, ýkraındar – 2,4%.