Almaty memlekettik qýyrshaq teatry qazaqstandyq boksshy, Sıdneı Olımpıadasynyń chempıony Bekzat Sattarhanovtyń batyl rýhyna arnalǵan «Chempıon» qoıylymynyń premerasyn teatr súıer qaýymnyń nazaryna usyndy.
Bul spektákl armanǵa degen adaldyq, maqsatqa jetý jolyndaǵy qajyrly eńbek, eli men jerine degen súıispenshilikti nasıhattaıtyn qoıylym jas jetkinshekterdi qaısarlyqqa, ójettilikke, batyldyqqa, shydamdylyqqa tárbıeleıdi.
Qýyrshaq teatry sahnasynda tuńǵysh ret usynylatyn qoıylymnyń ereksheligi – bolmysy bólek boks sheberi, ult maqtanyshy, nebári 20 jyldyq ǵumyrynda 143 jekpe-jek ótkizgen birtýar boksshynyń asqaq rýhyn qýyrshaq obrazynda kórsetý. Kınematografıa elementterin utymdy paıdalana otyryp, ár dáýirdegi qazaq halqynyń jeńisi men jeńilisin túrli sımvolıkalyq obrazdar arqyly tarıhı faktilermen baılanystyra qabystyrylǵan qoıylym Bekzat Sattarhanovtyń kúresi arqyly kúlli ult tarıhyn baıandaıdy.
«Úsh-tórt jyl buryn belgili aqyn Baqyt Bedelhan aǵamyz qýyrshaq teatrynan tapsyrys túsip tur, sony sen jazsań dep maǵan qolqa saldy. Buryn sport týraly jazbaǵanmyn, balalar taqyrybynda eki ese qıyn. Biraz tartynshaqtap júrdim de, aqyryndap bastap, jazyp berdim. Biraq odan keıin pandemıa boldy, sondyqtan 3 jyl ótkennen keıin pesa sahnalanaıyn dep jatyr. Biz Bekzat arqyly qazirgi balalarǵa rýh degenimiz ne, namys degen qandaı bolady, erik pen kúshtiń qýaty syndy qundylyqtardy túsindirgimiz keldi», – dedi «Chempıon» pesasynyń avtory, dramatýrg Álibek Baıbol.
Jasóspirimder aýdıtorıasyna arnalyp daıyndalǵan drama janryndaǵy qoıylymnyń rejıseri – Qazaqstannyń eńbek sińirgen qaıratkeri, teatr ardageri Orazáli Aqjarqyn-Sársenbek, avtory – Halyqaralyq «Alash» ádebı syılyǵynyń júldegeri, dramatýrg Álibek Baıbol, sýretshisi – Iýlıa Chernova, Anýar Búrkitbaev, mýzykamen kórkemdeýshi – Baqbergen Baıshyǵash, horeografy – Anna Soı.
«Teatrdyń tili bir-aq til, ol – rýhanı til. Búgingi spektákl bul Shekspır emes, basqa bir ǵulama dramatýrgtiń shyǵarmasy emes. Sondyqtan da onyń salmaǵy aýyr, keshe ǵana kóz aldymyzda júrgen Qazaqstan tarıhynda aty qalǵan Bekzat baýyrymyz jaıynda. Eger kimde kim Bekzattyń qalaı chempıon bolǵanyn kórgisi kelse, onda áleýmettik jelidegi fınaldy ashady. Bul Bekzat qalaı chempıon boldy degen suraqqa jaýap beredi. Al bizdiń qoıylym «nege chempıon boldy» degen suraqqa jaýap beredi. Ondaǵy aıtatyn jaýabymyz – qazaq halqynyń rýhy. Qoıylymda bári bar – saqtar da, «Aqtaban shubyryndy, Alqakól sulama» da, repressıa da. Bul spektákl adamnyń janyna azyq beretin qoıylym. Ár spektákl aqyl, oı-sana, túısigimizge oı salýy kerek. Jaı ǵana kúlip, jaı ǵana jylap ketý kerek emes. Myna spektákldi kórgen 200 balanyń ekeýi oılanyp ketetin bolsa, onda bizdiń maqsatymyzdyń oryndalǵany», – dedi qoıylym rejıseri, Qazaqstannyń eńbek sińirgen qaıratkeri Orazáli Aqjarqyn-Sársenbek.