Almatydaǵy jyldyń mádenı oqıǵalary: 334 konsert, 1,6 mıllıonnan astam kelýshiler men álemdik deńgeıdegi juldyzdar
2023 jyly Almatyda 334 aýqymdy konsert ótip, olarǵa 1,6 mıllıonnan astam adam kelgen. Qala alańdarynda, stadıondarda jáne arenalarda Qazaqstannyń belgili artıseri ǵana emes, álemdik deńgeıdegi juldyzdar da óner kórsetti. Olardyń arasynda 50 Cent, Akon, Lara Fabian, Ne-Yo, Tarkan, Outlandish, Arash jáne basqa da kóptegen ánshi bar. Aıtpaqshy, ótkizilgen is-sharalardyń 86%-yn komersıalyq jáne jeke kompanıalar uıymdastyrǵan.
«Shynynda da, 2023 jyl mádenı is-sharalarǵa toly boldy, qalamyzda kóptegen tanymal artıs keldi. Eger qorytyndylasaq, Almatyda sheteldik ánshilerdiń 47 konsert jáne otandyq artıser 287 konsert qoıǵan. Buǵan qosa, aýqymdy is-sharalar, sonyń ishinde halyqaralyq festıváldar ótkizdik. Tujyrymdamalyq turǵydan qarastyrsaq, onda bizdiń árbir is-sharamyz jeke brendke aınalyp, óz kórermenderin tartady. Qala ákimi mádenı astanamyz turǵyndar men qonaqtardy qyzyqty jobalarmen qýantyp, oqıǵaly týrızmdi damytýǵa jaǵdaı jasaý mindetin qoıyp otyr», - dedi Almaty qalasy mádenıet basqarmasynyń basshysy Ǵanı Maılybaev.
Aıta keteıik, 2023 jyly 19 jyldyq úzilisten keıin «Azıa Daýysy» halyqaralyq mýzykalyq festıvali ótti. İs-shara ıasynda otandyq oryndaýshylar da, álemdik deńgeıdegi sheteldik artıser de úsh kún boıy óner kórsetti. Festıváldiń hedlaıneri áıgili amerıkandyq The Black Eyed Peas toby boldy. Sonymen qatar, byltyr The Spirit of Tengri zamanaýı etnıkalyq mýzyka festıvali, sonymen birge, «Naýryz fest», «Almaty, lúblú tebá», «Týǵan kúnińmen, Almaty», «Saǵyndym Almatymdy» jáne «Zımnıı Novogodnıı festıvál» ótti. Barlyq festıvál megapolıs turǵyndary men qonaqtarynyń kóńilinen shyqty.
«Megapolıste aýqymdy is-sharalardy ótkizý oń ekonomıkalyq áser etedi. Bul jańa ýaqytsha jumys oryndaryn qurý, kóptegen týrıs tartý, oqıǵaly týrızmdi, qonaq úı bıznesin, meıramhanalar men jergilikti bıznesti damytý. Eń bastysy, jas artıserge belgili juldyzdarmen bir sahnada óner kórsetý múmkindigi, bul olardyń aýdıtorıasyn keńeıtýge, ónerin ushtaýǵa septigin tıgizedi. Biz barlyq artıser men is-sharalardy uıymdastyrýshylarǵa 2023 jyly birlesip jumys istegenderi úshin alǵys aıtamyz jáne kórermender úshin 2024 jylǵa arnalǵan mádenı mazmundy baǵdarlama daıyndap jatyrmyz», - dedi Almaty qalasy mádenıet basqarmasynyń basshysy Ǵanı Maılybaev.
Buǵan qosa, ótken jyly mádenıet basqarmasy Open air formatynda is-sharalar – festıváldar, kórmeler men konsertter uıymdastyrdy. Bul tek ortalyq alańdardy ǵana emes, sonymen qatar ár aýdandy da qamtydy. Osylaısha, qala turǵyndary úshin konsertterge tegin barý múmkindigi qosymsha jasaldy.
