Býtakovka men Terenkýr: Erbolat Dosaevtyń tapsyrmasymen Medeý aýdanyndaǵy almatylyqtardyń súıikti demalys oryndary abattandyrylady
Almatynyń Medeý aýdanynda jaıly qalalyq orta qurý jumystary jalǵasýda. Bul týraly qala ákimi Erbolat Dosaev osy aýdan turǵyndarymen kezdesýde habarlady.
Qoǵamdyq keńistikterdi damytý aıasynda «Terenkýr» aýmaǵyn jańǵyrtý jumystary júrgizilýde, onda 20 jyldan astam ýaqyt jóndeý jumystary júrgizilmegen. Toǵan abattandyrylyp, balalar alańdary, demalys aımaqtary, ıoga jáne sportpen aınalysýǵa arnalǵan oryndar jasalady. Qurylys-montaj jumystary bıyl qarasha aıynda aıaqtalady dep josparlanǵan.
Sonymen qatar, qala basshysy «Býtakovka» ózeniniń arnasyn qaıta qurý jáne sý qorǵaý beldeýin abattandyrýǵa arnalǵan jobalyq-smetalyq qujattama (JSQ) ázirlenip jatqanyn atap ótti. Joba arnany qaıta qurý jáne nyǵaıtý, jaıaý júrginshiler jolyn, demalys aımaǵyn, jaryqtandyrýdy jáne myńnan astam aǵash pen buta otyrǵyzýdy qamtıdy. JSQ ázirleý jáne saraptamadan ótkizý osy jyldyń sońyna deıin aıaqtalady.
Aǵymdaǵy jóndeý jumystary aıasynda Almatyda aýla aýmaqtaryn abattandyrý boıynsha 838 mln teńgege 13 joba jáne saıabaqtar men skverlerdi abattandyrý boıynsha 4 joba júzege asyrylýda. Barlyq jumys qazan aıynda aıaqtalady.
Sonymen qatar, «Halyq qatysatyn búdjet» baǵdarlamasy aıasynda 34 jobany iske asyrýǵa 2 mlrd teńge bólindi. Qazirgi tańda 3 aýla aýmaǵyn abattandyrý, 5 avtomatty sýarý júıesin ornatý jumystary aıaqtaldy. Bıyl qazan aıynyń sońyna deıin 17 aýla aýmaǵyn abattandyrý, 2 avtomatty sýarý júıesin ornatý, sondaı-aq 7 skver men sport alańynda jumystardy aıaqtaý josparlanyp otyr.
