Respýblıka saraıynda ótken sharaǵa 40-tan astam jumys berýshi qatysty
Almatyda múmkindigi shekteýli jandarǵa arnalǵan jumys jármeńkesi ótti, dep habarlaıdy Almaty-akshamy.kz Almaty.tv-ge silteme jasap.
Respýblıka saraıynda ótken sharaǵa 40-tan astam jumys berýshi qatysty.
24 jastaǵy Qanaǵat Tasqaraev – orta bilimdi zańger. Mamandyq boıynsha 3 jyl oqyǵan. Tek sodan beri ózine laıyqty, turaqty jumys tappaı keledi. Bos oryndarda kóp jaǵdaıda múmkindigi shekteýli jandarǵa jaǵdaı jasalmaǵan. Kóterilip-shyǵý bylaı tursyn, qarapaıym qajettilik dárethana da qarastyrylmaǵan.
«Vatsap, áleýmettik messendjerlerden «jármeńke bolady» dep oqyp, múmkindikti jiberip alǵym kelmedi. Jumys izdep keldim. Jyldyń aıaǵy bolsa da, jumys tabylsa degen nıet qoı», – dedi qala turǵyny Qanaǵat Tasqaraev.
Jumys jármeńkesinde qonaq úı, janarmaı beketteri, búdjettik mekemeler, bankter jumys orynyn usyndy. Jalpy is-sharada 150-ge jýyq bos jumys orny tańdaýǵa berildi. Al usynylǵan ortasha jalaqy - 150 myń teńge kóleminde.
«Jumys berýshiler múddeli bolyp otyr. Olaı deıtin sebebimiz, qoladanystaǵy zańnamaǵa sáıkes, jalpy shtattyń 2 paıyzynan 4 paıyzyna deıin múmkindigi shekteýli jandar jumys jasaý kerek. Búgin ózderi ynta-nıetin bildirip, jumys berýshiler kelip jatyr. Kasır, koll-ortalyq operatory, sondaı-aq ydys jýýshy sıaqty jumys túrlerin usynyp jatyr», – dedi Medeý aýdandyq mádenıet jáne tilderdi damytý bóliminiń basshysy Sáken Aralbaev.
Medeý aýdanynda 3 myńnan asa múgedek jan turady. Sonyń 70 paıyzy jumys isteýge qabiletti. Olardy jumysqa ornalastyrý - qala ákimdiginiń basty mindeti. Al árbir ótken jármeńkede shamamen 20-dan astam múmkindigi shekteýli jan eki qolǵa bir kúrek taýyp keledi.