Turǵyndar endi jańa ári sońǵy tehnologıadaǵy kabınalardy qoldanady
Almatyda apatty jaǵdaıda turǵan jedelsatylar tolyǵymen joıyldy, dep habarlaıdy Almaty-akshamy.kz Almaty.tv-ge silteme jasap.
qalalyq komýnaldyq ınfraqurylymdy damytý basqarmasynyń málimetinshe, 25 jyldan asa ýaqyt qyzmet kórsetken lıftiniń barlyǵy jańasyna aýystyrylǵan. Mundaı jańǵyrtý, jumystary «Nurly jer» baǵdarlamasynyń aıasynda júzege asyp jatyr. Budan bylaı Almatydaǵy kóp qabatty úılerde eski jedelsatylar bolmaıdy. Turǵyndar endi jańa ári sońǵy tehnologıadaǵy kabınalardy qoldanady.
«Bıyl baǵdarlama boıynsha Almatyda 352 lıft 169 úıde aýysýy kerek. Qazir sonyń 100 paıyzyn oryndadyq. Sondaı-aq bizde modernızasıalaýǵa jatatyn 130 úıdiń 76-sy oryndaldy. Endi 54 úı qaldy, ony jyl sońyna deıin atqaramyz», – dedi komýnaldyq ınfraqurylymdy damytý basqarmasynyń basshysy.
Jalpy, 5 jyldan beri jyl saıyn 300-den asa jedelsaty aýystyrylyp turǵan. Endi jańartý jumystarynyń esebinen keler jyldan bastap 50-60 lıft qaıta jasaqtalyp otyrady. Turǵyndar úshin lıftilerdi birneshe óndirýshiden tańdap alýǵa múmkindik jasalǵan. Bastysy sapasy myqty, 25 jylǵa deıin qyzmet kórsetse bolǵany. Al aýystyrýǵa ketetin qarjy 8 jyldan 15 jylǵa deıingi merzimge bólinip, komýnaldyq tólemderge qosylyp otyrady.
«Ketetin shyǵyndar eseptelip, shamamen 8 mıllon teńge shyqty. Basynda somany estigen turǵyndar úreılenip edi. Keıinnen qarjyny 15 jylǵa bólgende, qaltany qaqpaıtyny qýantty. Máselen, 4 bólmeli páter ıeleri 3 myń teńge tóleıdi», – dedi MIB tóraǵasy Olga Lapına.
Budan bólek modernızasıalaý baǵdarlamasy aıasynda úıge kúrdeli jóndeý júrgizý joly qarastyrylǵan. Ol úshin páter ıeleriniń jartysynan kóbi óz kelisimin berip, ótinish jazýy tıis.
«Jazda biz úıdiń shatyrlaryn jasaımyz. Al qazirgideı ýaqytta ishki jumystaryn retteımiz. Iaǵnı ınjenerlik jelilerin, podezderdegi elektr symdaryn aýystyramyz», – dedi komýnaldyq ınfraqurylymdy damytý basqarmasy basshysynyń orynbasary Nurbol Qajın.
Bıyl qalada 130 kóp qabatty turǵyn úı kúrdeli jóndeýden ótedi. Al qurylysqa ketetin qarjy komýnaldyq tólemder arqyly memleketke birtindep qaıtatyn bolady.