Almatynyń komýnaldyq qyzmeti jylýdyń aqshasyn tólemegen turǵyndardan sot arqyly qaryzyn óndirip, tolyq ótelgenshe páterindegi ystyq sýyn óshirmek. Qazirdiń ózinde ystyq sý men jylýdyń qaryzy shamamen 2,1 mıllıard teńgege jetti, dep habarlaıdy almaty-akshamy.kz «Almaty jylý júıesi» JSHS-ne silteme jasap.
Endi kún saıyn «Almaty jylý júıesine» qaryz birneshe ondaǵan boryshker ystyq sýdan qaǵylady. Aıta ketetin nárse, eki jáne odan da kóp aı boıy tólenbese, tutynýshy boryshker sanatyna enip, qaryzdy óteý týraly habarlama alady. Eger boryshker sonda da qaryzyn jappasa, shara qoldanylyp, páterindegi ne úıindegi ystyq sýy óshiriledi.
Boryshkerlerge ystyq sý berýdi toqtatý – bul amalsyz qoldanylǵan shara. Kásiporyn mundaı sharaǵa barýǵa májbúr, óıtkeni tutynýshylardyń jylýdyń aqysyn tólemeýi aldaǵy jylytý maýsymyna tolyq daıyndalýǵa, qystan qysylmaı shyǵýǵa keri áserin tıgizedi.
Bıyl jyl basynan beri Almatyda jylýdyń aqshasyn tólemegen 1610 abonenttiń úıindegi ystyq sýy óshirilgen. Búginge deıin kompanıaǵa jylý men ystyq sý úshin tólemegen 1212 tutynýshynyń aktıvi, 355 banktik esepshot buǵattaldy, tólemdi ýaqytynda tólemegen 165 azamatqa Qazaqstannan shyǵýǵa tyıym salyndy.
Sotqa shaǵym túsirý arqyly paıdalanylǵan jylý úshin bereshekti óndirip alýda boryshkerdiń jyljymaly jáne jyljymaıtyn múlkin, kólik quralyn, banktik shotyn buǵattaý, respýblıkadan tys jerge shyǵýyna shekteýler engizý, qyzmettiń barlyq túri boıynsha lısenzıalardyń qoldanylýyn jáne memlekettik organdardan qujat rásimdeýdi toqtata turý kózdelgenin esterińizge salamyz.
Sonymen qatar, qoldanystaǵy zańnamaǵa sáıkes, komýnaldyq qyzmet boıynsha qaryzdyń bolýy (boryshkerler týraly aqparat «Memlekettik kredıttik búro» AQ suraýy boıynsha beriledi) nesıe berý kezinde de eskeriledi.
Mundaı sharalar qaryzdy ádeıi tólemeýshilerge qatysty ǵana qoldanylady - ystyq sýdy óshirýden bastap sot arqyly óndirip alý sharasyn qoldanyp, kompanıa ókilderi olarǵa mindetti túrde jınaqtalǵan qaryzy týraly habarlap otyrady jáne basqa da birqatar aldyn alý sharasyn júrgizip keledi.
Jylý júıesiniń qyzmetkerleri qaryzdy óndirý jumystary turaqty túrde júrgizilip otyrǵanyn habarlady. Sondyqtan «AlJJ» JSHS azamattardy qaryzyn tez arada óteýge jáne komýnaldyq qyzmet úshin tólemdi ýaqytyly tóleýge jaýapkershilikpen qaraýǵa shaqyrady.