Saǵadat Nurmaǵambetovty eske alýǵa arnalǵan halyqaralyq boks týrnıri bastaldy
Qazaqstannyń tuńǵysh Qorǵanys mınıstri, Keńes Odaǵynyń Batyry, №1 Halyq qaharmany armıa generaly Saǵadat Nurmaǵambetovtyń 101 jyldyǵyna arnalǵan halyqaralyq boks týrnıri Astana qalasynda bastaldy. Bul týraly Aqshamnews.kz saıty habarlaıdy. Jarys Qorǵanys mınıstrligi Sport komıtetiniń uıymdastyrýymen Armıa ortalyq sport klýbynyń bazasynda ótýde.
Bıyl 28-shi márte ótkizilip otyrǵan bul dástúrli týrnır – elimizdiń áskerı-sporttyq ómirindegi eń iri sharalardyń biri. Ashylý saltanatyna Olımpıada chempıony Ermahan Ibraımov, sondaı-aq Qarýly kúshterdiń ardagerleri men sport salasynyń bedeldi ókilderi qatysty.
Qorǵanys mınıstrligi Sport komıtetiniń tóraǵasy, Armıa ortalyq sport klýbynyń bastyǵy polkovnık Arman Ábeýov óz sózinde:
«Saǵadat Qojahmetuly elimizdiń Qarýly kúshteriniń qalyptasýynda baǵa jetpes ról atqarǵan tulǵa. Ol biz úshin batyrlyq pen áskerı adaldyqtyń máńgilik úlgisi. Osyndaı týrnır arqyly jastarǵa onyń erligin úlgi etý – bizdiń paryzymyz», – dedi.
Týrnırge Qazaqstan, Reseı, Ázerbaıjan, Qyrǵyzstan, Armenıa, Tájikstan, Túrikmenstan, Mońǵolıa, Ózbekstan jáne Iran elderinen kelgen 200-den astam sportshy qatysýda. Sonymen qatar, Birikken Arab Ámirlikteri men Iran elderiniń ókilderi týrnırge baqylaýshy retinde qatysyp otyr. Jarys 13 salmaq dárejesi boıynsha ótýde.
Saǵadat Nurmaǵambetovty eske alýǵa arnalǵan bul týrnır – burynǵy chempıondar úshin úlken sportqa aparatyn alǵashqy baspaldaq bolǵan. Burynǵy jeńimpazdar qatarynda Serik Sápıev, Gennadıı Golovkın, Vasılıı Jırov, Danıar Eleýsinov, Baqtıar Artaev, Jánibek Álimhanuly jáne Birjan Jaqypov sekildi aty ańyzǵa aınalǵan boksshylar bar.
Bıyldan bastap týrnır chempıondaryna "sport sheberi" ataǵy resmı túrde berile bastaıdy. Bul – jarystyń mańyzyn odan ári arttyryp otyr.
Astana tórindegi bul halyqaralyq týrnır 30 mamyrǵa deıin jalǵasady. Bul shara tek sporttyq doda emes, sonymen birge el qorǵany bolǵan tulǵanyń erligin ulyqtaýǵa arnalǵan patrıottyq máni zor is-shara. Sportshylar tek jeńis úshin emes, batyr rýhyna taǵzym retinde de rıngke shyǵýda.