Ál-Farabı atyndaǵy Qazaq ulttyq ýnıversıteti jýrnalısıka fakúltetinde «LG AI MediaLab» ǵylymı-zertteý ortalyǵy ashyldy.
«LG AI MediaLab» – neırojelilerdi medıa jáne komýnıkasıa salasynda qoldanatyn elimizdegi alǵashqy zerthana. Ǵylymı ortalyqta JI jáne Big Data kafedrasymen birlese keshendi zertteýler júrgizilip, jasandy ıntellekt kómegimen túrli tehnologıalyq sheshimder ázirlenedi.
Atap aıtqanda baspasóz qyzmetteri úshin jańalyq materıaldarynan joba qurylady. Iaǵnı AI kómekshisi baspasóz qyzmetteriniń taqyryptaryna sáıkes, jańalyq mátinderiniń jobalaryn avtomatty túrde jasaıdy. Buǵan qosymsha marketıń maqsaty úshin áleýmettik jelilerge arnalǵan kontent ázirlenedi. Zerthana maqalalar men jańalyq materıaldaryndaǵy derekterdiń shynaıylyǵyn tekserý úshin arnaıy bilim qorlaryn paıdalana alady. Sondaı-aq jasandy ıntellekt kómegimen stýdenttik gazet shyǵarylady.
Ashylý saltanatyna QazUÝ Basqarma Tóraǵasynyń orynbasary – birinshi prorektor Erkin Dúısenov, LG Electronics Almaty Kazakhstan kompanıasynyń prezıdenti Hak Hón Kım, jýrnalısıka fakúltetiniń dekany Qanat Áýesbaı, oqytýshy-professorlyq quram men bilim alýshy jastar qatysty.
İs-sharany oqý ordasynyń prorektory Erkin Dúısenov quttyqtaý sózben ashyp, ǵylymı ortalyq jasandy ıntellekt salasyn damytýǵa, stýdentterdiń osy baǵyttaǵy jumystaryn jetildirýge aıryqsha úles qosatynyn jetkizdi.
«Memleket basshysy Qasym-Jomart Toqaev óz sózinde: «Ǵylymı-tehnıkalyq úderis jaǵdaıynda elimizdiń tehnologıalyq jáne ǵylymı-ınnovasıalyq táýelsizdigin nyǵaıtý úshin barsha múmkindikti paıdalaný mańyzdy. Bul turǵyda jasandy ıntellektini damytý zor múmkindikke jol ashyp otyr», – dep atap ótken bolatyn. QazUÝ bazasynda jasandy ıntellekt ortalyǵyn qurý – ýnıversıtettiń bilim men tájirıbege negizdelip, jańa ekojúıe qalyptastyrýǵa baǵyttalǵan strategıalyq qadamy», – dedi Erkin Dúısenov.
Óz kezeginde LG Electronics Almaty Kazakhstan kompanıasynyń prezıdenti Hak Hón Kım:
«LG AI MediaLab» ǵylymı ortalyǵy – LG Electronics kompanıasy men ál-Farabı atyndaǵy QazUÝ arasyndaǵy seriktestiktiń sımvoly. Bolashaqta atalǵan zerthanada bilim alýshy jastar jasandy ıntellekt salasynda mol tájirıbe jınaqtap, jetistikke jetetinine senimdimin», – dedi.
Jasandy ıntellekt zerthanasyndaǵy bilim berý sıfrlyq tehnologıalar men áleýmettik ǵylymdar toǵysyndaǵy pánaralyq baǵytta júzege asady. Sonyń arqasynda neırojelilerdiń ozyq tájirıbesi bilim berý úrdisine engizilip, derekti taldaý, vızýaldy storıtellıng jáne úlken tildik modelderdi (LLM) biriktirýge jol ashylady. Zerthana joǵary sapaly keskinder jáne vızýaldy derekpen jumys isteýge yńǵaıly zamanaýı «LG Ultra Gear» monıtorlarymen jabdyqtalǵan.
Ótken jyly Qazaqstan men Qytaı basshylarynyń memleketaralyq kelisimi aıasynda QazUÝ-ǵa Ortalyq Azıadaǵy eń qýatty sýperkompúter ornatylǵan bolatyn. «LG AI MediaLab» zerthanasy sýperkompúterdiń múmkindigin paıdalaný maqsatynda ortaq derekqorǵa biriktiriletin bolady.