Qalalyq kásipkerler palatasy bergen málimetke súıensek, búginde 364 myńnan astam adam óz isin dóńgeletip otyr.
Ásirese, shaǵyn jáne orta bızneske myqtap kóńil bólinýde. Ótken jyly osy salanyń ókilderin qoldaýǵa memlekettik jáne óńirlik baǵdarlamalar sheńberinde 48 mlrd teńgeden astam qarajat bólindi, dep habarlaıdy Almaty-akshamy.kz Qazaqstan.tv-ǵa silteme jasap.
Bıyl da bul baǵyttaǵy jumystar jalǵasyn tappaq. Óıtkeni, memlekettiń damýyna yqpal ete alatyndaı, jaýapkershilikten qoryqpaıtyn kásipkerlerdiń jańa tolqynyn qalyptastyrý kerek. Bul týraly Prezıdent Qasym-Jomart Toqaev kúni keshe Parlament palatalarynyń birlesken otyrysynda aıtqan edi. Shaǵyn orta bıznes ókilderi memleket basshysynyń bul pikirimen tolyqtaı kelisedi. Olardyń aıtýynsha, kásirkerlerdi qoldaý mehanızmderin áli de jetildire túsý qajet.
«Prezıdentimiz naqty dál aıtyp otyr. El bolamyz desek osy kásipti birigip kóterý kerekpiz, óný kerekpiz. Men qazir shaǵyn ǵana kásipkermin. Maǵan ósip-óný úshin, qondyrǵylar alý úshin, jaqsy jumysshylarmen jumys isteý úshin qarajat qajet. Úkimet bizge eki paıyzben qarajat berse eken deımin. Eger berip jatsa, óndirisimizdi keńeıtip, shyǵarǵan zattarymyzdy kóbeıtetin edik», - deıdi kásipker Sandýǵash Esenbekova.