Kúzgi áskerge shaqyrý naýqany júrýde
Almatyda kúzgi áskerge shaqyrý naýqany 1 qyrkúıekte bastalyp, 31 jeltoqsanǵa deıin jalǵasady, dep habarlaıdy Almaty-akshamy.kz QazAqparatqa silteme jasap.
Ol týraly onlaın brıfıńte Almaty qalasy qorǵanys isteri jónindegi departamentiniń basshysy Amantaı Óserbaev aıtty.
«18 jastan 27 jasqa deıingi keıinge qaldyrýǵa nemese odan bosatýǵa quqyǵy joq azamattar merzimdi áskerı qyzmetke shaqyrylady. QR Prezıdentiniń buıryǵy negizinde Almaty qalasy ákiminiń qaýlysymen qalada shaqyrý komısıasy quryldy. Komısıa tóraǵasy bolyp Almaty qalasy ákiminiń orynbasary Serik Qusaıynov taǵaıyndaldy. Sonymen qatar, shaqyrý komısıasynyń quramyna quqyq qorǵaý organdary men qoǵamdyq birlestikterdiń ókilderi endi. Bıyl Almatydan 1500 jas jigit áskerge alynady», - dedi A. Óserbaev.
Qorǵanys isteri jónindegi departament basshysynyń aıtýynsha, qazirgi ýaqytta Ulttyq qaýipsizdik komıtetiniń áskerı bólimderin jasaqtaý aıaqtalýǵa jaqyn, keıinnen Ulttyq ulan Qarýly kúshteri men Memlekettik kúzet qyzmetiniń áskerı bólimderi jasaqtalady.