Bul ómirge qaýipti!
Osyndaı 5 oqıǵa ólimmen aıaqtaldy, dep habarlaıdy Almaty-akshamy.kz.
Shuǵyl tejegishti basýdyń sebebi - temirjol kóligindegi qaýipsizdik erejelerin buzǵan jaıaý júrginshiler men avtomobılshilerdiń nemquraıdylyǵy bolyp tabylady. Almaty óńirlik komýnıkasıalar qyzmetiniń alańynda «QTJ-Júk tasymaly» JSHS fılıaly-«JT Almaty bólimshesi» bas ınjeneriniń mindetin atqarýshy Aleksandr Igoshenniń qatysýymen brıfıń ótti.
Spıker atap ótkendeı, temirjoldyń qaýipti aımaq ekenin mamandar únemi eske salady. Sondyqtan temirjoldyń janynda barynsha muqıat bolǵan jón.
«Aǵymdaǵy jyldyń 7 aıynda temirjoldyń Almaty fılıalynyń shekarasynda lokomotıv brıgadalary shuǵyl tejegishti 110 qoldandy, onyń ishinde 5 oqıǵa ólimmen aıaqtaldy. Tejeý sanynyń azaıǵanyna qaramastan, statısıka óte jaǵymsyz», - dep atap ótti A.Igoshen.
Búginde temirjolshylar apattardyń (adamdardyń poezd astynda qalýy) aldyn alý úshin barlyq sharalardy qabyldaýda: jelilik polısıa bólimimen birlesip reıdter júrgizilýde, túsindirme áńgimeler, oqý oryndarynda kezdesýler ótýde, plakattar ilinýde, jaıaý júrginshiler kópirlerin salý, t.b. máseleler jergilikti atqarýshy organdarmen birlesip pysyqtalady.
Mysaly, bıyl eki myńnan astam adamdy qamtyǵan kezdesýler, sondaı-aq Almaty-1 stansıasynda shuǵyl tejeýge beıim ýchaskede 10 reıd ótkizildi.
«Temirjoldyń janynda turatyn adamdar qozǵalys qaýipsizdigin esten shyǵarmaǵandary jón. Olar temirjoldaǵy belgilenbegen oryndarda joldardy kesip ótpeýi, temirjol kóligi obektilerinde oıyn-saýyqtar ótkizbegeni abzal. Jolaýshylar poıyzdarynyń jyldamdyǵy saǵatyna 140 km-ge jetedi, al júk poıyzdary saǵatyna 110 km jyldamdyqpen júredi, salmaǵy 7000 tonnadan asady. Mundaı kórsetkishter kezinde lokomotıv brıgadasy jolda kedergini baıqasa, shuǵyl tejeýdi qoldanýy ábden múmkin. Al lokomotıvti oqys toqtatqan kezde, joldyń beıinine, poezdyń salmaǵyna jáne qozǵalys jyldamdyǵyna baılanysty keminde 500 metr, al keıde bir kılometrden artyq qashyqtyq qajet bolady. Bul avtokólik emes, onda birneshe metr qashyqtyqta toqtaýǵa nemese bir jaqqa burýǵa bolady», - dedi QTJ spıkeri.
Aleksandr Igoshen poıyzdardy shuǵyl toqtatý temirjol kóliginiń jumysyna keri áser etetinin aıtty.
«Olardyń qozǵalys yrǵaǵy adamdardyń, maldyń nemese avtokóliktiń bolýy sebebinen oqys, josparsyz toqtaǵan kezde úziledi. Qozǵalysta irkilister oryn alýda, bul orynsyz shyǵyndarǵa ákeledi, poıyzdar qozǵalysynyń qaýipsizdigi, al avtokólikpen soqtyǵysqan kezde vagondar men lokomotıvterdiń buzylady», - dep tolyqtyrdy A.Igoshen.
Temirjolshylarǵa balalardyń temirjoldarda oınaýy jáne áleýmettik jeliler úshin rolıkter túsirýi erekshe alańdaýshylyq týǵyzady.
Spıkerdiń aıtýynsha, temirjol kóligi nysandarynda beınerolıkter túsirý, qulaqqappen mýzyka tyńdaý, ásirese, kapúshondy kıip alý óte qaýipti. Óıtkeni mundaı jaǵdaıda lokomotıv beretin sıgnaldardy estimeı qalady ári aldyn baıqamaıdy.
Spıker almatylyqtar men qala qonaqtaryn temirjoldaǵy tártip erejelerin múltiksiz saqtaýǵa shaqyrdy. Muqıat jáne qyraǵy bolý kerek! Tek sonda ǵana apattyń aldyn alýǵa bolady. Kez-kelgen adam temirjol kóligi obektilerinde arnaıy bólingen oryndarda: jabdyqtalǵan jaıaý júrginshiler ótpeleri, tonnelder, kópirler, temirjol ótpeleri, jol ótpeleri arqyly kesip ótýge tıis. Temirjol relsterin yńǵaıly jerde nemese ýaqytty únemdeý úshin kesip ótýge bolmaıdy. Bul ómirge qaýipti!