Megapolıste joba aıasynda 2 myńǵa jýyq ǵımarattyń jedelsatysy aýystyrylǵan
Almatyda bıyl 100-den astam turǵyn úı jańarady. Birneshe jyldan beri jóndeý kórmeı, tozyǵy jetken baspanalar jańasha túrge enedi, dep habarlaıdy Almaty-akshamy.kz Almaty.tv-ge silteme jasap.
Memlekettik baǵdarlama aıasynda úıdiń qasbetin jańartý, ınjenerlik jelilerin aýystyrý jáne jertóle men kireberisine kúrdeli jóndeý júrgizý qarastyrylǵan. Ol úshin qarjy nesıelik júıemen beriledi. Qomaqty qarajatty 8 jyldan 15 jylǵa deıin bólip tóleýge bolady. Bastysy - paıyzsyz. Iaǵnı, turǵyndar aldymen memleket qarjysyna úılerin jóndep, keıinnen ony az mólsherde bólip tóleý arqyly qaıtarady.
«Bastapqyda biz turǵyndarmen úıdiń shatyryn jóndeýge keliskenbiz. Keıinnen memleketten beriletin qarjy arqyly úıdi tolyǵymen jańartýǵa bolatynyn bildik. Sóıttik te, birden kelistik. Úıdiń syrtyn boıaıtyn tústi de ózimiz tańdadyq. Aı saıynǵy tólemi de tıimdi. Árkim ózi turatyn páteriniń sharshy metrine qaraı ártúrli tóleıdi. Shamamen 5- 7 myń teńge aralyǵynda. Ol aı saıyn komýnaldyq tólemmen birge kelip otyrady», – dedi qala turǵyny Elena Ýmekenova.
Aıta keteıik, baǵdarlama 2011 jyldan beri júzege asyrylyp keledi. Búginge deıin megapolıste osy joba aıasynda 965 kóp qabatty turǵyn úı jańartylyp, 2 myńǵa jýyq ǵımarattyń jedelsatysy aýystyrylǵan. Salaǵa jaýapty basqarma mamandarynyń habarlaýynsha, bıyl kúrdeli jóndeý júrgizýge 83 turǵyn úı ótinim bergen.
«Turǵyndardan suranys áli de qabyldanyp jatyr. «Almaty» turǵyn úı jaýapkershiligi shekteýli seriktestigine baryp, qujatyn tapsyra alady. Keıinnen ózderimen birlesip, jınalys jasaımyz. Kúrdeli jóndeý jumystary ózderi qalaǵandaı jasalady. Ony jasaǵan merdiger kompanıa ókilderi 2 jylǵa deıin kepildik beredi. Osy ýaqyt aralyǵynda qandaı da bir aqaý bolsa, ony óz qarajatyna jóndep berýge mindetteledi», – dedi Komýnaldyq ınfraqurylymdy damytý basqarmasy basshysynyń orynbasary Nurbol Qajın.