Dınaranyń tańdaýy AQSH-taǵy Stenford ýnıversıtetine tústi
Dınaranyń boıynda qazaq qyzyna tán qaısarlyq bar. Ol álemniń 26 memleketinen oqýǵa shaqyrtý aldy, dep habarlaıdy Almaty-akshamy.kz Almaty.tv-ge silteme jasap.
Dınara - 18 jasta. Respýblıkalyq fızıka matematıka mektebiniń túlegi. Ózi aqyldy, sulý, ónerli.
Odan bólek, az qamtylǵan otbasynda tárbıelenip jatqan balalarǵa matematıka jáne baǵdarlamalaý boıynsha 200-den astam sabaq ótkizip, bilim alýyna kómektesedi. Ǵylymı jobalar jáne sporttyq jarystardaǵy jeńisi úshin de kóp marapatqa ıe bolǵan. Al bıyl álemniń kósh bastap turǵan 26 oqý ornynan shaqyrtý alypty.
«8-synypta shetelde oqıtyn stýdentterdiń sýretterin, vıdeolaryn kóre bastadym. 9-synypta Amerıka jáne Anglıaǵa oqýǵa túsý jaıly málimetter izdeı bastadym. 10-synypta daıyndyqty bastadym», – dedi respýblıkalyq fızıka-matematıka mektebiniń túlegi Dınara Qalıhan.
Dınaranyń tańdaýy Google, Instagram negizin qalaýshylar, AQSH-tyń 31 prezıdenti oqyǵan Stenford ýnıversıtetine tústi. Al ustazy shákirtiniń bilimge degen izdenisiniń zor ekenin aıtady. Boıyndaǵy ójettilik pen tabandylyq ony kóp jetistikke jeteleıtinine senimdi.
«Dınaranyń maqsaty aıqyn boldy. Mektep qabyrǵasynda júrgende-aq sheteldik ýnıversıtterge túsem degen maqsat qoıdy», – dedi espýblıkalyq fızıka-matematıka mektebiniń ustazy Jannur Melsqyzy
«Armanyna jetip, sol Stenford ýnıversıtetine oqýǵa joldama aldy», – dedi respýblıkalyq fızıka-matematıka mektebiniń ustazy Dıdar Ardaq.
«Biz Dınaramen maqtanamyz. Jetistigi alda dep senemiz», – dedi respýblıkalyq fızıka-matematıka mektebiniń ustazy Dınara Qýandyqqyzy.
Ozat oqýshy magıstratýrany da sol oqý ordasynda támamdaǵysy keledi. Bilimin jetildirip, elge oralǵan soń, paıdaly jobalardy iske asyrǵysy keletinin aıtty.
«Sabaq kezderinde Dınara óte belsendiligimen jáne kóshbasshy qasıetimen erekshelenedi. Matematıkaǵa degen qushtarlyǵy óte jaqsy. Biz synypta esepti jarysyp shyǵaratynbyz», – dedi Dınaranyń synyptasy Nurbolat Sultanbaev.
Dınara buǵan deıin de synyptasymen birigip, erekshe joba oılap tapqan. Ondaǵy basty maqsat – zorlyq zombylyqqa ushyraǵan jandarǵa kómek qolyn sozý. Aıta keteıik, byltyr elimizdiń 15 úzdik túlegi ózge memlekettiń joǵary oqý oryndaryna túsken.