Qala boıynsha barlyǵy 989 ýchaske uıymdastyrylǵan.
Bul málimetterdi Óńirlik komýnıkasıalar qyzmetiniń baspasóz konferensıasy barysynda Qoǵamdyq densaýlyq basqarmasy basshysynyń orynbasary Laýra Myrzaǵalı málimdedi, dep habarlaıdy Almaty-akshamy.kz
QDB ókiliniń derekteri boıynsha, búgingi kúni Almaty qalasy boıynsha jalpy praktıka dárigeriniń bir ýchaskesine júkteme – 1 616 adamdy quraıdy, josparly júkteme – 1 700 adam, bir terapevtik ýchaskege – 2 164 eresek adam, jospar boıynsha – 2 200 adam, pedıatrıalyq ýchaskede jospar boıynsha 6 jasqa deıingi 500 bala bolýy tıis, al mundaǵy balalar sany – 777.
«Búginde pedıatrıalyq ýchaskelerde 14 jasqa deıingi balalar tirkelgen. Biz 6 jasqa deıingi balalarǵa qyzmet kórsetetin pedıatrıalyq ýchaskelerdiń júktemesin kezeń-kezeńmen azaıtýdy josparlap otyrmyz», - dedi Laýra Myrzaǵalı.
QDB basshysynyń orynbasary jalpy praktıka dárigerleriniń júktemesin eskere otyryp, 2021 jylǵy 1 qańtar men 1 shilde aralyǵynda Almatyda MSAK uıymdarynda jalpy praktıka dárigerleriniń 15 qosymsha ýchaskesi ashylǵanyn aıtty. Qala boıynsha barlyǵy 989 ýchaske uıymdastyrylǵan.
Sonymen qatar, Laýra Myrzaǵalı Almaty turǵyndary búgin «Damý» mobıldik qosymshasynda elektrondyq qyzmetterdiń keń spektrin paıdalana alatynyn habarlady. Mysaly, dárigerdiń qabyldaýyna jazylý, Dárigerdi úıge shaqyrý, zerthanalyq zertteýlerdiń nátıjelerin, aýrýhana paraqtaryn qaraý, dári-dármekterdi tabý jáne t. b.
«Nátıjesinde pasıentterge qyzmet kórsetý ýaqyty 20%-ǵa, kezekte turý ýaqyty 30%-ǵa qysqardy. Pasıentti dárigerge jazý ýaqyty 2 ese jáne dárigerdi úıge shaqyrý ýaqyty 1,5 ese azaıdy», - dep atap ótti QDB basshysynyń orynbasary.
Bul qosymshanyń yńǵaılylyǵy 859 myńǵa jýyq adamnyń jeke kabınetter quryp, onda kórsetilgen qyzmetterdi belsendi paıdalanatyndyǵymen rastalady.
Búginde «Elektrondy densaýlyq pasporty» 1 856 329 adamǵa quryldy, ol barlyq tirkelgen halyqtyń 98%-yn qurady.