Qazirgi ýaqytta olardyń 772-i páter aldy.
Almatylyq mamandar jastarǵa qalaı baspana alýǵa bolatynyn aıtyp berdi, dep habarlaıdy Almaty-akshamy.kz Almaty.tv silteme jasap.
Almaty turǵyn úı saıasaty basqarmasy jetekshisiniń orynbasary Ermek Ámirovtyń aıtýynsha, baspanany Otbasy banktiń «Baqytty otbasy» baǵdarlamasy arqyly alýǵa bolady.
«Bul baǵdarlama arqasynda kóp balaly, tolyq emes, múmkindigi shekteýli bala tárbıelep otyrǵan otbasy naryqta jańa salynǵan nemese erterekte tapsyrylǵan páterdi ala alady. Úsh jyl ishinde baǵdarlamaǵa 634 almatylyq otbasy qatysty», – dedi Ámirov brıfıń barysynda.
Turmysy tómen turǵyndar kezegindegilerge turǵyn úı sertıfıkaty da beriledi. Olardy qaıtarýdyń qajeti joq. Bul soma "Otbasy bankindegi" jeńildikpen beriletin ıpotekanyń alǵashqy jarnasyn jabý úshin qarastyrylǵan.
Sertıfıkatty qalaı alýǵa bolady:
Sertıfıkat I jáne II top múgedekterine, jetim balalarǵa, múgedek bala asyrap otyrǵan otbasyǵa, ata-ana qamqorlyǵynsyz qalǵan balalarǵa, kóp balaly otbasyǵa beriledi. Bul úshin Almaty ákimdigi jergilikti búdjetten 2 mıllıard teńge bóldi. Somasy 1 mıllıon teńge bolatyn 2 000 qaıtarymsyz sertıfıkat tabystalady.
Jumys isteıtin jastar «Almaty jastary» baǵdarlamasyna qatysa alady. Onyń aıasynda 1 000 jas otbasy baspanamen qamtyldy.
«Bıyl taǵy 1 000 jas otbasy baspanaly bolady. Qazirgi ýaqytta olardyń 772-i páter aldy»,– dedi Ámirov.
Buǵan qosa, taǵy 1 050 jumys isteıtin jasty 5 jylǵa deıin jalǵa beriletin baspanamen qamtý josparlanyp otyr.