Bul baǵaǵa jasyl jelekti satyp alý, otyrǵyzý jáne sapaly kútimdi qamtamasyz etý, 3 jyl boıy sýarý kiredi
Qalalyq ekologıa jáne qorshaǵan orta basqarmasynyń basshysy Serik Ádilbaev Almatynyń kógaldandyrýyna qatysty sapaly ózgeristerdi aıtyp berdi, dep habarlaıdy Almaty-akshamy.kz
«Jasyl jelekterdi qorǵaýdyń burynǵy erejesine sáıkes, 2021-2022 jyldary bir jasyl jelekke 500-den 6000 teńgege deıin qarajat bólindi. Bul somaǵa eki jyl ishinde jasyl jelekti satyp alý, otyrǵyzý jáne kútý kirdi. Osy somaǵa satyp alynǵan jasyl jelekter tamyrlanyp ósip ketpedi, 30%-y qýrap qaldy. Osyǵan baılanysty qala ákimi Erbolat Dosaevtyń tapsyrmasymen bir jasyl jelekke arnalǵan búdjet 16 myń teńgege deıin kóbeıdi. Bul baǵaǵa jasyl jelekti satyp alý, otyrǵyzý jáne sapaly kútimdi qamtamasyz etý, 3 jyl boıy sýarý kiredi», - dedi Serik Ádilbaev.
Jańa erejede kóshetterdiń sapasy, bıiktigi keminde 2,5-3 metr bolýy kerek, sonymen qatar, egilgen aǵashtardy jaqsylap sýarý syndy talaptar kúsheıdi. Buryn mundaı talaptar bolǵan emes.
2022-2023 jj. kúzgi-kóktemgi maýsymda saıabaqtarda, skverlerde jáne Almaty kósheleriniń boıynda 973 myń kóshet otyrǵyzyldy, olardyń 50%-y 29 uńǵymany jáne jer astyndaǵy sý burý júıesin salý esebinen sýarýmen qamtamasyz etildi. Ósimdikterdi sýarý úshin qazirgi kezde aryqtar arqyly ózen aǵynyn baǵyttaıtyn eski sý jınaǵysh qalpyna keltirilip jatyr.
Dástúrli túrde kóshetter Almaty oblysynyń tálimbaqtarynan satyp alyndy. Burynǵy tálimbaqtar qala qajettiliginiń 60%-yn ǵana qamtamasyz etetinin eskerip, bıyl kóshetter klımattyq jaǵdaıy Almaty qalasyna uqsas Túrkistan oblysynyń tálimbaqtarynan satyp alynady. Bolashaqta Almaty oblysynyń tálimbaqtarynan kóshet tapshylyǵy josparly jumys esebinen sheshiledi, bul tálimbaqtardyń júktemesi men óndiristik qýatyn arttyrýǵa, sonymen qatar, aýyldaǵy jumyssyzdyq máselesin sheshýge múmkindik beredi.
Esterińizge sala keteıik, 20 qyrkúıekten bastap Almatyda kúzgi aǵash otyrǵyzý bastalady. Qalada 298 myń kóshet egiledi. Kúzgi otyrǵyzý qalanyń barlyq aýdanyn qamtıdy. Atap aıtsaq, Medeý aýdanynda 22 myń, Jetisý aýdanynda 16 myń, Túrksib aýdanynda 28 myń, Naýryzbaı aýdanynda 10 myń, Almaly, Áýezov jáne Bostandyq aýdandarynda 5 myń, Alataý aýdanynda 207 myń aǵash.