Almaty qalasynyń Medeý aýdanynda «Belsendi uzaq ómir» ortalyǵy ashyldy, dep habarlaıdy almaty-akshamy.kz.
Bul ortalyqtyń negizgi maqsaty – egde jasyna baılanysty ózine qyzmet kórsetýge múmkindigi joq qarttarǵa jáne zeınet jasyna jetken azamattarǵa, sonymen qatar zeınet jasyna jetip, densaýlyq jaǵdaıyna baılanysty emge muqtaj qarttarǵa jartylaı stasıonarlyq jaǵdaıda qyzmet kórsetý.
79 jastaǵy Yrymbala Sattanova – jańa ortalyqqa alǵash kelýshilerdiń biri. Nemere-shóberelerin aıaqtandyrǵan áje endi ózine ýaqyt taýyp, densaýlyǵyn kútip júr. Osy ortalyqta túrli is-sharaǵa qatysyp, zamandastarymen birge ýaqytyn tıimdi ári paıdaly ótkizgisi keledi.
"2019 jyldan bastap qalanyń ortasyndaǵy «Belsendi uzaq ómir» ortalyǵyna baryp júrdik. Bizge alys bolatyn. Endi mine úıimizdiń janynan ashylyp qýanyp otyrmyz. Osy bir aýdannyń ózinen 90-ǵa jýyq qarıalar bar. Barlyǵymyz osy jerge kelip úıirmelerge qatysyp, ýaqytymyzdy ótkizetin boldyq. Osy ýaqytqa deıin skandınavıalyq júris, ıoga, aǵylshyn tili syndy úıirmelerge qatysyp, ózimizben qatarlsa jandardy kezdestirgen edik", – deıdi zeınetker Yrymbala Sattanova.
Ortalyqta kóptegen qyzmet túri kórsetiledi. Atap aıtsaq, ıoga, saýyqtyrý jáne uzaq ómir súrý psıhologıasy, bı, jadty nyǵaıtý tehnıkasy, sıgýn, skandınavıalyq serýendeý, vokal jáne hor, emdik dene shynyqtyrý, qazaq jáne aǵylshyn tilderi, psıholog pen zańger keńesi, eńbek terapıasy jáne sándik-qoldanbaly óner, toǵyzqumalaq jáne shahmat, akterlyq sheberlik, akva aerobıka, tenıs.